އިންސާނުންނާއި މީދަލުގެ ހަށިގަނޑުގައި ހުންނަ ބްރައުން ފެޓް ނުވަތަ މައިގަނޑު ގޮތެއްގައި ހީޓް އުފައްދައިދޭ ސެލްތަކުން ކެލޮރީ އެންދުމުގެ އަމަލީ މަސައްކަތް ބެލެހެއްޓުމުގައި ހަރަކާތްތެރިވާ ހާއްސަ ޕްރޯޓީނެއް ސައިންސްވެރިން ހޯދައިފިއެވެ.
ކޯޕަންހޭގަން ޔުނިވަރސިޓީގެ ނޯވޯ ނޯޑިސްކް ފައުންޑޭޝަން ސެންޓަރ ފޯ ބޭސިކް މެޓަބޮލިކް ރިސަރޗްގެ ދިރާސާވެރިން އިސްނަގައިގެން ކުރިއަށްގެންދިޔަ މި ދިރާސާއިން ދައްކާގޮތުގައި ”SLC25A34“ ގެ ނަމުން ނަންދެވިފައިވާ މި ޕްރޯޓީނަކީ ހަށިގަނޑުގެ ބަޔޮލޮޖިކަލް ކްލޮކާއި، ފިނިހޫނުމިނުގެ ބަދަލުތަކާއި އަދި ކާނާއިން ލިބޭ ފެޓަށް އިޖާބަދީގެން ކެލޮރީ އެންދުމުގެ މިންވަރު ކޮންޓްރޯލްކުރާ މުހިންމު ޕްރޯޓީނެކެވެ.
ސައިންސްވެރިން ހާމަކުރި ގޮތުގައި މީދަލުގެ މައިޓޯކޮންޑްރިއާގެ ތެރެއިން ފެނުނު މި ޕްރޯޓީނަކީ ފިނި މާހައުލުތަކުގައި ހަށިގަނޑުގެ ހޫނުމިން ހިފެހެއްޓުމަށާއި ކެލޮރީ އަންދައިދިނުމަށް ނުހަނު މުހިންމު ދައުރެއް އަދާކުރާ އެއްޗެކެވެ. މީދާ ފިނި މާހައުލެއްގައި ބެހެއްޓުމުން މި ޕްރޯޓީން ހަށިގަނޑުގައި އުފެދޭ މިންވަރު 90 ގުނައަށް އިތުރުވެގެންދިޔަކަން ދިރާސާއިން ވަނީ ކަށަވަރުވެފައެވެ. އަދި ޖީން އެޑިޓިންގ ބޭނުންކޮށްގެން މި ޕްރޯޓީން ނުހުންނަ ގޮތް ހެދުމުން، މީދަލުގެ ހަށިގަނޑުން އޮކްސިޖަން ބޭނުންކުރާ މިންވަރާއި ކެލޮރީ އެންދުމުގެ ގާބިލުކަން ވަރަށް ބޮޑަށް ދަށްވެގެންދިޔައެވެ.
އިންސާނުންގެ ސެލްތަކާއި ބްލަޑް ސާމްޕަލްތައް ބޭނުންކޮށްގެން ކުރެވުނު ތަހުލީލުތަކުން ދެއްކި ގޮތުގައި ހަށިގަނޑުގެ ހަމުގެ ދަށުގައި SLC25A34 ޕްރޯޓީން ގިނައިން ހުންނަ މީހުންގެ ބޮޑީ މާސް އިންޑެކްސް (ބީއެމްއައި) ދަށްވެ، އިންސުލިން ރެސިސްޓެންސް ކުޑަވެފައި ސިއްހީ ހާލަތު ރަނގަޅުކަން ފާހަގަކުރެވުނެވެ. މިއީ މައިޓޯކޮންޑްރިއާގެ ތެރޭގައި ސެލްތަކަށް ބޭނުންވާ މޮލެކިއުލްތައް ދަތުރުކުރުމުގައި އެހީތެރިވެދޭ ޕްރޯޓީނަކަށްވާތީ، މިއީ ހަށިގަނޑުގައި ފެޓް އަންދައި އަދި އާ ފެޓް އުފެއްދުމުގެ ދައުރު މެދުކެނޑުމެއްނެތި ކުރިއަށްގެންދިއުމަށް މަގުފަހިކޮށްދޭ ”ސްވިޗެއް“ ކަމަށް ރިސާޗަރުން ބުނެއެވެ.
މި ކަން ހޯދުމުގެ ސަބަބުން ކުރިއަށް އޮތް ތަނުގައި މެޓަބޮލިޒަމް އަވަސްކޮށް، ފަލަވުމާއި ހަކުރުބަލި ފަދަ ބަލިތަކަށް އާ ފަރުވާތަކެއް ހޯދުމުގެ ފުރުސަތު ބޮޑުވެގެންދާނެ ކަމަށް މަޝްހޫރު ”ސައިންސް“ ޖަރނަލްގައި ޝާއިއުކުރެވުނު މި ދިރާސާގެ މުސަންނިފުން ބުނެއެވެ.
