އެމެރިކާއިން ފޮނުވި އެންމެ ފަހުގެ ޑިޕްލޮމެޓިކް ހުށަހެޅުންތަކަކީ ”ފުރިހަމަނޫން“ އަދި ސާފުނުވާ ހުށަހެޅުންތަކެއްކަމަށް ބުނެ، އީރާނުން އެމެރިކާއާއެކު ކުރިއަށްގެންދާ މަޝްވަރާތައް މަޑުޖައްސާލައިފިއެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުޙްސިން ރިޟާއީ ބުނީ، އެމެރިކާއިން އީރާނުގެ ބައެއް ޝަރުޠުތައް ޤަބޫލުކުރި ނަމަވެސް، އަނެއްބައި ކަންކަން އަދިވެސް އޮތީ ނުސާފުކޮށް ކަމަށެވެ. އެހެންކަމުން އެކަންކަން ސާފުކޮށްދެންދެން އެމެރިކާއަށް އިތުރު ޖަވާބެއް ނުދޭނެކަމަށް އޭނާ ބުންޏެވެ.
އީރާނުން މީގެ ކުރިން ވަނީ އެއް ހަފްތާ ތެރޭގައި ހުރްމުޒް ކަނޑުއޮޅި ހުޅުވާލުމަށް ހުށަހަޅާފައެވެ. ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ހުށަހެޅުން ޤަބޫލުނުކޮށްފައެވެ. އެމެރިކާގެ ނައިބު ރައީސް ޖޭޑީ ވެންސް ބުނެފައިވަނީ، އެއްބަސްވުމަކަށް އާދެވޭނީ އީރާނުން ޔުރޭނިއަމް ފައްކާކުރާ މިންވަރު ވަރަށް ބޮޑަށް ދަށްކޮށްގެން ކަމަށެވެ.
