ރާއްޖޭގައި ކާނާގެ ޔަގީންކަން ކަށަވަރުކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެވަޑައިގެންފައިވާ ވަޢުދުފުޅު ފުރިހަމަކުރުމަށާއި، 5 މިލިއަން ގަސް އިންދުމުގެ ޕްރޮގްރާމުގެ ދަށުން 10 ރަށެއްގައި އެގްރޯފޮރެސްޓްރީ ދަނޑުތައް ގާއިމުކުރުމަށްޓަކައި ކައުންސިލްތަކާއެކު އެއްބަސްވުމުގައި ސޮއިކޮށްފިއެވެ.
މިކަމަށްޓަކައި ބޭއްވި ޚާއްޞަ ރަސްމިއްޔާތުގައި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްގެ ފަރާތުން ސޮއިކުރެއްވީ ސްޓޭޓް މިނިސްޓަރ މުޙައްމަދު ނާއިފްއެވެ. އަދި ރަށްތަކުގެ ފަރާތުން ސޮއިކުރެއްވީ އެ ރަށްރަށުގެ ކައުންސިލް ތަމްސީލުކުރައްވާ މެންބަރުންނެވެ.
މި މަޝްރޫއަކީ ފިޝަރީޒް މިނިސްޓްރީއާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ ގުޅިގެން ކުރިއަށްގެންދާ މަސައްކަތެކެވެ. އެގްރޯފޮރެސްޓްރީ ދަނޑުތައް އެޅުމަށް އެއްބަސްވުމުގައި ސޮއިކުރެވުނު 10 ރަށަކީ ހއ. ބާރަށް، ރ. އިނގުރައިދޫ، ކ. ކާށިދޫ، ކ. މާފުށި، ކ. ތުލުސްދޫ، މ. ވޭވަށް، ލ. އިސްދޫ، ގއ. ގެމަނަފުށި އަދި ގދ. ހޯޑެއްދޫއެވެ.
މި ޕްރޮގްރާމުގެ ދަށުން ގާއިމުކުރެވޭ ދަނޑުތަކަކީ ތިމާވެއްޓާ ރައްޓެހިކޮށް ފަރުމާކުރެވި، ޒަމާނީ ފެންވަރަށް ތަރައްގީކުރެވޭ ނަމޫނާ ދަނޑުތަކެކެވެ. 10 ރަށެއްގައި ގާއިމުކުރެވޭ 2 ހެކްޓަރާއި 4 ހެކްޓަރާއި ދެމެދުގެ ބޮޑުމިން އެކުލެވޭ މި ދަނޑުތަކުގައި މައިގަނޑުގޮތެއްގައި ހެއްދުމަށް ހަމަޖެހިފައިވަނީ ރާއްޖޭގެ ތިމާވެއްޓާ ގުޅޭ، ދިގުމުއްދަތަކަށް ހެއްދޭ ބާވަތްތަކާއި އެކު ކުރުމުއްދަތެއްގައި ހެއްދޭ ކާނާގެ ބާވަތްތަކެވެ.
މި ދަނޑުތަކުގެ ސަބަބުން ދިގުމުއްދަތަކަށް ކާނާއާއި މުޑުވައްގަސް އުފެއްދުމަށް މަގުފަހިވެ، ރާއްޖެއަށް އެތެރެކުރާ ކާބޯތަކެތި މަދުކުރެވި، އެކަމަށް ކުރަންޖެހޭ ހަރަދު ކުޑަވެގެންދާނެއެވެ. މީގެ އިތުރުން މި ދަނޑުތަކަކީ މިނިސްޓްރީގެ ފަންނީ ބޭފުޅުންގެ ލަފާގެ ދަށުން ކައުންސިލްތަކުން ހައްދަމުންގެންދާނެ ދަނޑުތަކެއް ކަމުން، ރަށުގެ ދަނޑުވެރިންނަށް ރައްކާތެރިކަމާއެކު ދަނޑުވެރިކަން ކުރުމުގެ ފަންނީ މައުލޫމާތު ލިބިގެންދާނެއެވެ.
މިނިސްޓްރީގެ އުންމީދަކީ މި ދަނޑުތަކުގެ ޒަރިއްޔާއިން ކާނާގެ ޔަގީންކަން އިތުރުކޮށް، 5 މިލިއަން ގަސް އިންދުމުގެ ޕްރޮގްރާމަށް ހަތަރު ލައްކައަށްވުރެ ގިނަ ގަސް އުފެއްދިގެން ދިއުމެވެ. އަދި މި މަޝްރޫއުގެ ސަބަބުން ދަނޑުވެރިކަމުގެ ސިނާއަތް ދެމެހެއްޓެނިވި ގޮތެއްގައި ކުރިއަރައި، ތިމާވެއްޓާ ރައްޓެހި ޒަމާނީ ދަނޑުވެރިކަމަކަށް ރާއްޖޭގެ ދަނޑުވެރިކަން ބަދަލުވެގެންދިއުމެވެ.
