ވ. ތިނަދޫ ކައުންސިލްގެ ރައީސްގެ މަގާމު ހުސްވުމާ ގުޅިގެން އެ މަގާމަށް މީހަކު އިންތިޚާބު ކުރުމަށް ބާއްވާ ބައި-އިލެކްޝަން އަންނަ ނޮވެމްބަރު މަހުގެ 28 ވަނަ ދުވަހު ބޭއްވުމަށް ނިންމައި، އެ އިންތިޚާބުގައި ވާދަކުރުމުގެ ފުރުސަތު އިލެކްޝަންސް ކޮމިޝަނުން މިއަދު އާންމުކޮށް ހުޅުވާލައިފިއެވެ.
އިލެކްޝަންސް ކޮމިޝަނުން ކުރި އިއުލާނެއްގައި ބުނެފައިވަނީ، ތިނަދޫ ކައުންސިލުގެ ރައީސްކަމުގެ މަގާމަށް ކުރިމަތިލާން އެދޭ ފަރާތްތަކަށް މިއަދުން ފެށިގެން މި މަހުގެ 26 ވަނަ ދުވަހުގެ މެންދުރުފަހު 2:00 އާ ހަމައަށް ފޯމު ހުށަހެޅުމުގެ ފުރުސަތު އޮންނާނެ ކަމަށެވެ. އެ މުއްދަތުގެ ތެރޭގައި ހުކުރު ދުވަސް ނޫން ކޮންމެ ދުވަހަކު ހެނދުނު 8:30 އިން މެންދުރުފަހު 2:00 އަށް އަދި ހުކުރު ދުވަހު މެންދުރުފަހު 3:30 އިން އިރުއޮއްސި 6:00 އަށް ފޯމު ބަލައިގަންނަމުން ދާނެ ކަމަށްވެސް އެ ކޮމިޝަނުން މައުލޫމާތު ދެއެވެ.
ވ. ތިނަދޫ ކައުންސިލްގެ ރައީސްގެ ގޮނޑި ހުސްވެފައިވަނީ، އެ މަގާމުގައި ހުންނެވި ޝުޖާއު އަލީ ޕާޓީ ބަދަލުކުރެއްވި ކަމަށް ބުނެ ގޮނޑި ގެއްލިއްޖެ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ކަނޑައެޅުމާ ގުޅިގެންނެވެ. މިހާރު އުވާލާފައިވާ ދަ ޑިމޮކްރެޓްސްގެ ޓިކެޓުގައި އިންތިޚާބުވި ޝުޖާއުގެ ގޮނޑި ގެއްލިއްޖެ ކަމަށް އެލްޖީއޭއިން ނިންމާފައިވަނީ މިދިޔަ ޖުލައި މަހުގެ ކުރީކޮޅުގައެވެ.
މީގެ ކުރިން ވ. އަތޮޅު ކައުންސިލުގެ ރައީސްކަންވެސް ކުރައްވާފައިވާ ޝުޖާއު ވިދާޅުވެފައިވަނީ އެލްޖީއޭގެ ނިންމުމަކީ ގާނޫނީ އިޖުރާއަތްތަކާ ހިލާފަށް ނިންމާފައިވާ ނިންމުމެއް ކަމަށެވެ. އަދި އިލެކްޝަންސް ކޮމިޝަނުން އެ މަގާމަށް ބައި-އިލެކްޝަނެއް ބާއްވަން ހުޅުވާލައިފިނަމަ، އަލުން އިންތިޚާބުގައި ވާދަކުރައްވައި އެ ގޮނޑި ކާމިޔާބު ކުރައްވާނެ ކަމަށްވެސް އޭނާ ވަނީ ވިދާޅުވެފައެވެ.
