ސަރުކާރުގެ ވުޒާރާތަކުން ކުރިއަށްގެންދާ މަސައްކަތްތަކުގެ ތަފުސީލު ރައްޔިތުންނާ ހިއްސާކޮށް، ވަޒީރުންނާ ސީދާ ސުވާލުކުރުމުގެ ފުރުސަތު ހުޅުވާލައިގެން ކުރިއަށްގެންދާ ”އަހާ“ ފޯރަމް ސިލްސިލާގެ ނުވަވަނަ ބައްދަލުވުން މިރޭ ބޭއްވުމަށް ހަމަޖެހިއްޖެއެވެ.
ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ގެނެސްދޭ މި ފޯރަމް ކުރިއަށްދާނީ މިރޭ 9:00 އިން ފެށިގެން ދެ ގަޑިއިރުގެ ވަގުތަކަށެވެ.
މިރޭގެ ބައްދަލުވުމުގައި ބައިވެރިވެވަޑައިގެން އާންމުންގެ ސުވާލުތަކަށް ޖަވާބު ދެއްވުމަށް ހަމަޖެހިފައިވަނީ ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު، ގީލާ އަލީ، ފަންނާއި ސަގާފަތާއި ތަރިކައާ ބެހޭ ވަޒީރު، ހީނާ ވަލީދު އަދި ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު، މުޙައްމަދު އަމީން އެވެ.
ދައުލަތުގެ މީޑިއާއިން ވަގުތުން ލައިވްކުރާ މި ޕްރޮގްރާމުގައި، ފޯރަމް ކުރިއަށްދާ މާލަމަށް ހާޒިރުވެގެންނާއި، ޕީއެސްއެމް އެއާ އެޕްލިކޭޝަން މެދުވެރިކޮށް ވަޒީރުންނާ ސުވާލު ކުރުމުގެ ފުރުސަތު ވަނީ ހުޅުވާލެވިފައެވެ.
މި ފޯރަމަކީ ސަރުކާރުގެ ވުޒާރާތަކާއި އިދާރާތަކުގެ މަސައްކަތްތަކާ ގުޅޭގޮތުން ރައްޔިތުންގެ ހުރި ކަންބޮޑުވުންތަކާއި ޝަކުވާތަކަށް، އެ އިދާރާތަކުގެ އެންމެ އިސްވެރިންގެ ފަރާތުން ސީދާ ޖަވާބު ހޯދައިދިނުމުގެ މަގުސަދުގައި ކުރިއަށްގެންދާ ހަރަކާތެކެވެ.
ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސަރުކާރުން 2024 ވަނަ އަހަރު ތައާރަފުކުރި މި ފޯރަމްގެ 8 ބައްދަލުވުމެއް މިހާތަނަށް ވަނީ ބާއްވާފައެވެ. މި ސިލްސިލާގެ 7 ވަނަ ފޯރަމް ބާއްވާފައިވަނީ ހުސްވި ސެޕްޓެންބަރު މަހުގެ 27 ވީ އާދީއްތަ ދުވަހުގެ ރޭގައެވެ.
