އީރާނާއެކު ކުރަމުންދާ ހަނގުރާމައިގައި މަރުވި އެމެރިކާ ސިފައިންގެ އަދަދަކީ 21 ކަމަށާއި، އަދި ޒަޚަމްވި މީހުންގެ އަދަދަކީ 865 ކަމަށް އެމެރިކާގެ ޑިފެންސް ޑިޕާޓްމަންޓް (ޕެންޓަގަން) އިން ރަސްމީކޮށް އިޢުލާނުކޮށްފިއެވެ.
މީގެ ކުރިން ޕެންޓަގަން އިން ބުނަމުން އައީ ހަނގުރާމައިގައި މަރުވީ 18 ސިފައިން ކަމަށެވެ. ނަމަވެސް އޮކްޓޯބަރު 10 ވަނަ ދުވަހު އާންމުކުރި އައު ހިސާބުތަކުން ދައްކާގޮތުގައި މަރުވި މީހުންގެ އަދަދު ވަނީ 21 އަށް އަރާފައެވެ. އަދި ކުރިން ހާމަނުކުރާ 140 އަށްވުރެ ގިނަ ސިފައިން ޒަޚަމްވެފައިވާކަންވެސް މިހާރު ވަނީ ހާމަކޮށްފައެވެ.
ފާއިތުވި ސެޕްޓެމްބަރު މަހު، ޕެންޓަގަން އިން މަރުވި މީހުންގެ އަދަދު ފޮރުވާފައިވާކަމަށް ވޮޝިންގޓަން ޕޯސްޓުން ރިޕޯޓުކުރުމުން، އެމެރިކާގެ ޑިފެންސް ސެކްރެޓަރީ ޕީޓް ހެގްސެތް ވަނީ އެކަން ވަރަށް ބޮޑަށް ދޮގުކުރައްވާފައެވެ. އޭނާ އޭރު ވިދާޅުވީ އެއީ ”ކަނޑައެޅިގެން ދޮގެއް“ ކަމަށާއި އެ ނޫހަކީ އީރާނުގެ މީޑިއާތަކަށްވުރެވެސް ގޯސް ބައެއް ކަމަށެވެ. ނަމަވެސް މިހާރު ޕެންޓަގަން އިން އާންމުކުރި ހިސާބުތަކުން އެ ނޫހުން ރިޕޯޓުކުރި މަޢުލޫމާތަކީ ތެދުކަން ވަނީ ހާމަވެފައެވެ.
މީގެ އިތުރުން، ޖުލައި މަހުން ފެށިގެން ޒަޚަމްވި މީހުން ގުނުމަށް ’އޯވަރސީސް އޮޕަރޭޝަންސް‘ ނަމުގައި އައު ކެޓަގަރީއެއް ޕެންޓަގަން އިން ވަނީ ތަޢާރަފުކޮށްފައެވެ. ސިޔާސީ ފަރާތްތަކުން ތުހުމަތުކުރާ ގޮތުގައި މިއީ ހަނގުރާމައިގެ ޙަޤީޤީ ގެއްލުންތައް ފޮރުވުމަށް ކުރާ ކަމެކެވެ.
