ޔަމަނުގެ ރަތް ކަނޑުގެ އައްސޭރިފަށުގައި ތިބި ހޫޘީ ހަނގުރާމަވެރިން ފަހަތަށް ޖެއްސުމަށްޓަކައި، ސަޢޫދީ އިސްވެ އޮންނަ ޔަމަނުގެ ކޯލިޝަނުން ވަރުގަދަ ވައިގެ ޙަމަލާތަކެއް ’ކާޕެޓް ބޮމިންގ‘ ދޭން ފަށައިފިއެވެ.
މި ޙަމަލާތައް މައިގަނޑު ގޮތެއްގައި އަމާޒުކުރަމުންދަނީ ބާބް އަލް-މަންދަބް، ޛުބާބް އަދި މުޚާ ސިޓީއަށެވެ. މިއީ ސެޕްޓެމްބަރު މަހުގެ ކުރީކޮޅު ސަރުކާރު ސިފައިން ފަހަތަށް ޖެހުމާ ގުޅިގެން ހޫޘީން ހިފާފައިވާ ސަރަޙައްދުތަކެކެވެ.
ކޯލިޝަނުން މައިގަނޑު ގޮތެއްގައި އަމާޒުކުރަނީ ހޫޘީންގެ ސަޕްލައި ރޫޓުތައް ކަނޑާލައި، އެމީހުންނަށް ހަތިޔާރާއި އެހީ ފޯރުކޮށްދޭ މަގުތައް ބަންދުކުރުމަށެވެ. މި ޙަމަލާތަކުގެ އެހީގައި ޔަމަނުގެ ސަރުކާރު ސިފައިން ބާބް އަލް-މަންދަބް އަދި ޛުބާބްގައި ބޮޑެތި ކުރިއެރުންތަކެއް ހޯދަމުންދާކަމަށް ސަރުކާރުން ބުނި ނަމަވެސް، ހޫޘީން ވަނީ މިކަން ދޮގުކޮށްފައެވެ.
