ޕޯޗުގަލްގެ ޤައުމީ ޓީމާ ދެމެދު އުފެދުނު މައްސަލަތަކަށްފަހު އެނބުރި ކްލަބް ފުޓުބޯޅައަށް އައިސް، ކްރިސްޓިއާނޯ ރޮނާލްޑޯ ކާމިޔާބުކޮށްދިން ލަނޑާއެކު ސައުދީ ޕްރޯ ލީގުގައި ދިރިޢިއްޔާ އަތުން 3-0 އިން އަލް ނަސްރު މޮޅުވެއްޖެއެވެ.
ހުކުރު ދުވަހު ކުޅުނު މި މެޗަކީ ފަހަކަށް އައިސް ޕޯޗުގަލް ކޭމްޕުގައި ހިނގައިދިޔަ ހަމަނުޖެހުންތަކާ ގުޅިގެން ޤައުމީ ޓީމު ދޫކޮށްލުމަށްފަހު ރޮނާލްޑޯ ކުޅުނު ފުރަތަމަ މެޗެވެ. ޤައުމީ ޓީމަށް ކުޅެދިން 234 މެޗުން 146 ލަނޑު ޖަހައިދީފައިވާ އުމުރުން 41 އަހަރުގެ ރޮނާލްޑޯ، ޕޯޗުގަލް ޓީމު ދޫކޮށްލީ ނޭޝަންސް ލީގުގައި އޭނާ ކުޅުވުމާ މެދު ކޯޗު ޖޯޖް ޖީސަސް ވީ ވަޢުދާ ޚިލާފުވުމުން ކަމަށް ބުނެ، މިދިޔަ އަންގާރަ ދުވަހު ނެރުނު ބަޔާނެއްގައެވެ.
Job done. On to the next one! 💪🏽 pic.twitter.com/lwKjjmcOBG
— Cristiano Ronaldo (@Cristiano) October 9, 2026
ކުރީގެ ޓޮޓެންހަމްގެ ކޯޗު އޭންޖް ޕޮސްޓެކޮގްލޫގެ އިރުޝާދުގެ ދަށުން ކުޅޭ އަލް ނަސްރުން ދިރިޢިއްޔާއާ ދެކޮޅަށް ކުޅުނު މެޗުގައި ރޮނާލްޑޯ ވަނީ މެޗުގެ ފުރަތަމަ ހާފުގެ މެދުތެރޭގައި އެ ޓީމަށް ލީޑު ނަގައިދީފައެވެ. މި ލަނޑަކީ ކިންގްސްލީ ކޯމަން ފޮނުވާލި ހަމަލާއެއް ކީޕަރު ވަލީދު އަބްދުﷲ ދިފާއުކުރުމުން، ލިބުނު ބޯޅަ ގޯލުގެ ތެރެއަށް ފޮނުވާލައިގެން ރޮނާލްޑޯ ކާމިޔާބުކުރި ލަނޑެކެވެ. މިއީ އޭނާގެ ފުޓުބޯޅަ ކެރިއަރުގައި ކާމިޔާބުކުރި 980 ވަނަ ލަނޑެވެ.
މެޗުގެ ފުރަތަމަ ހާފު ނިމެން ދަނިކޮށް ސާމޫ ކޮސްޓާ އަލް ނަސްރަށް ދެވަނަ ލަނޑު ޖަހައިދިންއިރު، ތިންވަނަ ލަނޑު މެޗު ނިމެން 13 މިނެޓަށް ވެފައި ވަނިކޮށް ކާމިޔާބުކޮށްދިނީ ކޯމަންއެވެ.
މި މޮޅާއެކު، ލީގުގެ އަށްވަނަ ބުރު ނިމުނުއިރު އެންމެ ފަހުގެ ޗެމްޕިއަން އަލް ނަސްރު އޮތީ ތާވަލުގެ އެއްވަނައިގައި އޮތް އަލް ޤާދިސިއްޔާއާ ޕޮއިންޓުގެ ގޮތުން އެއްވަރުވެ، ފައިދާ ގޯލުގެ ތަފާތުން ދެވަނައިގައެވެ. އަލް ޤާދިސިއްޔާ ވަނީ ކުރިން ކުޅުނު މެޗުގައި އަލް ޚުލޫދު އަތުން 5-0 އިން މޮޅުވެފައެވެ. އެ މެޗުގައި ނެދަލެންޑްސްގެ ޓިޖާނީ ރެއިންޑާސްގެ އިތުރުން އިޓަލީގެ މަޓެއޯ ރެޓެގީ އަދި މެކްސިކޯގެ ހޫލިއަން ކީނޯނެސް ވަނީ ލަނޑު ޖަހާފައެވެ.
