ދިވެހިރާއްޖޭގެ ފަތުރުވެރިކަމުގެ ސިނާއަތުގައި ރަޖިސްޓްރީކޮށްފައިވާ އެނދުތަކުގެ 99 އިންސައްތަ އޮޕަރޭޝަނަށް ގެނެސް، ގާތްގަނޑަކަށް މުޅި ސިނާއަތް ފުރިހަމައަށް ހިންގަން ފަށައިފިއެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މި ހިނގާ އޮކްޓޯބަރު މަހުގެ 7 ވަނަ ދުވަހުގެ ނިޔަލަށް ރާއްޖޭގައި ފަތުރުވެރިކަމުގެ ހިދުމަތް ދިނުމަށް ޖުމްލަ 1،293 ތަނެއް ރަޖިސްޓްރީކޮށްފައިވެއެވެ. މިއީ 68،733 އެނދުގެ ޤާބިލުކަމެކެވެ. މީގެ ތެރެއިން މިވަގުތު އޮޕަރޭޝަނުގައި އޮތީ 1،289 ތަނެއްގެ 68،013 އެނދެވެ.
މިވަގުތު އޮޕަރޭޝަނުގައިވާ ތަންތަނުގެ ތެރޭގައި 45،171 އެނދާއެކު 180 ރިސޯޓާއި، 16،822 އެނދާއެކު 927 ގެސްޓްހައުސް ހިމެނެއެވެ. މީގެ އިތުރުން 3،366 އެނދުގެ 166 ސަފާރީއާއި، 2،654 އެނދުގެ 16 ހޮޓާވެސް މިވަގުތު އަންނަނީ ފަތުރުވެރިންނަށް ހިދުމަތް ދެމުންނެވެ.
އަހަރުގެ މިހާތަނަށް ރާއްޖެއަށް 1،642،478 (އެއް މިލިއަން ހަ ލައްކަ ސާޅީސް ދެ ހާސް ހަތަރުސަތޭކަ ހަތްދިހަ އަށް) ފަތުރުވެރިން ޒިޔާރަތްކޮށްފައިވާއިރު، އެންމެ ގިނައިން ފަތުރުވެރިން އައިސްފައިވަނީ ޗައިނާއިންނެވެ. އެއީ 311،485 ފަތުރުވެރިންނެވެ. ދެވަނައިގައި 234،718 ފަތުރުވެރިންނާއެކު ރަޝިޔާ އޮތްއިރު، 122،067 ފަތުރުވެރިންނާއެކު ތިންވަނައިގައި އޮތީ އިނގިރޭސިވިލާތެވެ.
ފަތުރުވެރިކަމުގެ ޕީކް ސީޒަން ކުރިއަށްދާއިރު، ރާއްޖޭގެ އެނދުތަކުގެ ބޮޑު ބައެއް އޮޕަރޭޝަނަށް ގެނެވި، ފުރިހަމައަށް ބޭނުންކުރެވެމުން ދިޔުމަކީ ރާއްޖޭގެ އިގްތިސާދަށް ލިބިގެންދާނެ ބޮޑު ދިރުމެކެވެ.
