އިސްތިއުމާރުކޮށްފައިވާ ވެސްޓު ބޭންކުގައި ފަލަސްޠީނުގެ ރައްޔިތުން ޒައިތޫނި ބިނދުމުގެ މަސައްކަތް ކުރަމުންދަނިކޮށް، އިޒްރޭލުގެ ހައްދުފަހަނަޅާފައިވާ ފޭރިފައިވާ ބިންތަކުގައި ދިރިއުޅެމުންދާ ޣައިރު ޤާނޫނީ ޔަހޫދީ ވަޒަންވެރިން ޙަމަލާދީ 3 ދަނޑުވެރިއަކު ވަގަށް ނަގައިފިއެވެ.
އޮކްޓޯބަރު 10، 2026 ގައި ތުލްކަރްމްގެ ޤައްފީން އަވަށުގައި ޒައިތޫނި ބިނދުމުގެ މަސައްކަތުގައި އުޅުނު ދަނޑުވެރިންނަށް ޙަމަލާދީ، އެމީހުން ބިނދެފައި ހުރި ޒައިތޫނިތައް ފޭރުމަށްފަހު، 3 ދަނޑުވެރިއަކު ވަނީ ވަގަށް ނަގާފައެވެ.
ބައިތުލްމަޤްދިސްގެ ހުޅަނގުން އޮންނަ ނަހާލިން އަވަށުގެ ދަނޑުވެރިންނަށްވެސް އިޒްރޭލު ވަޒަންވެރިން ދަނީ ވަރަށް ބޮޑަށް ގޯނާކޮށް، ދަނޑުތަކަށް ވަނުން މަނާކުރަމުންނެވެ. މީގެ ކުރިން މި ސަރަޙައްދުންވެސް ދަނޑުވެރިން ވަގަށް ނަގާފައިވެއެވެ.
ޒައިތޫނި ބިނދުމަކީ ފަލަސްޠީނުގެ އެތައް ހާސް އާއިލާއެއްގެ ދިރިއުޅުމުގެ މައިގަނޑު އާމްދަނީއެވެ. އިޒްރޭލު ސިފައިންގެ ޙިމާޔަތުގައި ތިބެ، ޔަހޫދީ ވަޒަންވެރިން ދަނީ ގަސްތުގައި މި މޫސުމާ ދިމާކޮށް ދަނޑުވެރިންނަށް ޙަމަލާދީ، ގަސްތައް އުފުރައި، އަދި ޒައިތޫނިތައް ވަގަށް ނަގަމުންނެވެ.
