މުޅި ދުނިޔޭގެ އިޤްތިޞާދަށް ގޮންޖެހުންތައް ކުރިމަތިވެފައިވާ ދަނޑިވަޅެއްގައިވެސް، ބޭންކް އޮފް މޯލްޑިވްސް (ބީއެމްއެލް) އިން މި އަހަރުގެ ފުރަތަމަ ނުވަ މަސްދުވަހުގެ ތެރޭގައި 1.93 ބިލިއަން ރުފިޔާގެ ސާފު ފައިދާއެއް ހޯދައި، އެ ބޭންކުގެ މާލީ ވަރުގަދަކަން އަނެއްކާވެސް ސާބިތުކޮށްދީފިއެވެ.
މި އަހަރުގެ ސެޕްޓެމްބަރު މަހުގެ ނިޔަލަށް ލިބުނު މި ފައިދާއަކީ މިދިޔަ އަހަރުގެ އެ މުއްދަތުގައި ލިބުނު 1.53 ބިލިއަން ރުފިޔާއާ އަޅާބަލާއިރު 26 އިންސައްތައިގެ ކުރިއެރުމެކެވެ. މީގެ ތެރެއިން އެކަނިވެސް އަހަރުގެ ތިންވަނަ ކުއާޓަރުގައި ސާފު ފައިދާގެ ގޮތުގައި 647.2 މިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ ތިންވަނަ ކުއާޓަރާ އަޅާބަލާއިރު 36 އިންސައްތައިގެ އިތުރުވުމެކެވެ.
ބޭންކުގެ ވިޔަފާރި ފުޅާވަމުންދާ މިންވަރު ދައްކުވައިދޭ އެންމެ ބޮޑު އެއް ކަމަކީ ލޯނު ދޫކުރުމާއި ޑިޕޮސިޓްތަކަށް އައި ކުރިއެރުމެވެ. އެގޮތުން މި އަހަރުގެ ފުރަތަމަ ނުވަ މަސްދުވަހު އަލަށް ދޫކުރި ލޯނުތަކުގެ ޖުމްލަ 12.1 ބިލިއަން ރުފިޔާއަށް އަރާފައިވާއިރު، މިއީ މުޅި މިދިޔަ އަހަރު ދޫކުރި ޖުމްލަ ލޯނަށްވުރެވެސް އިތުރު އަދަދެކެވެ. އަދި ކަސްޓަމަރުން ބޭންކުގައި ބަހައްޓާފައިވާ ޑިޕޮސިޓްތައް 14 އިންސައްތައިގެ ކުރިއެރުމަކާއެކު 42.36 ބިލިއަން ރުފިޔާއަށް ވަނީ އުފުލިފައެވެ.
ބޭންކިންގ މުއާމަލާތްތަކަށް ބަލާއިރު، މި މުއްދަތުގެ ތެރޭގައި ރާއްޖޭން ބޭރަށް ފޮނުވާފައިވާ ފައިސާގެ ޖުމްލަ 2.86 ބިލިއަން ޑޮލަރަށް އަރައެވެ. އަދި 2025 ވަނަ އަހަރުގެ މުޅި އަހަރު ދޫކުރި ޑޮލަރާ ގާތްކުރާ އަދަދެއް ކަމަށްވާ 722.1 މިލިއަން ޑޮލަރު، ދިވެހި ރުފިޔާއަށް ބަދަލުކޮށްގެން ކަސްޓަމަރުންނަށް ދޫކޮށްފައިވާކަން މާލީ ބަޔާނުން ދައްކައެވެ. މިއީ މަހެއްގެ މައްޗަށް އެވްރެޖްކޮށް 80.2 މިލިއަން ޑޮލަރުގެ މަގުން ވިއްކާފައިވާ އަދަދެކެވެ.
މާލީ ވަރުގަދަކަން ހިފެހެއްޓުމުގެ ގޮތުން ތިންވަނަ ކުއާޓަރު ނިމުނުއިރު ބޭންކުގެ ކެޕިޓަލް އެޑިކުއެސީ ރޭޝިއޯ ހުރީ 38 އިންސައްތައިގައެވެ. މިއީ ރެގިއުލޭޓަރީ މިންގަނޑުން ލާޒިމުކުރާ 12 އިންސައްތައަށްވުރެ ތިންގުނަ އިތުރު އަދަދެކެވެ. މީގެ އިތުރުން ކޮސްޓް-ޓު-އިންކަމް ރޭޝިއޯ 28 އިންސައްތައިގައި ހުރުމާއެކު، ބީއެމްއެލްއަކީ ސަރަޙައްދީ ފެންވަރުގައިވެސް އެންމެ ހިންގުންތެރި އެއް ބޭންކުގެ ގޮތުގައި ވަނީ ފާހަގަކުރެވިފައެވެ.
ބީއެމްއެލްއިން ބުނި ގޮތުގައި މިފަދަ އެދެވޭ ނަތީޖާއެއް ހާސިލުކުރެވުނީ އިގުތިސޯދުގެ މުހިންމު ދާއިރާތަކަށް ދޫކުރާ ލޯނު އިތުރުވުމާއި، ޑިޕޮސިޓް ބޭސް ފުޅާވުމުގެ އިތުރުން ޑިޖިޓަލް މުއާމަލާތްތައް އިތުރުވުމުގެ ސަބަބުންނެވެ. އަދި ދުނިޔޭގެ ޖިއޯޕޮލިޓިކަލް މަސްރަޙަށް އަންނަ ބަދަލުތަކާއެކު ގޮންޖެހުންތައް ބޮޑު މާހައުލެއްގައިވެސް މިފަދަ ނަތީޖާއެއް ލިބުމަކީ ކުރިއަށްއޮތްތަނަށް ލިބުނު ބޮޑު އުންމީދެއް ކަމަށް ބޭންކުން ފާހަގަކުރެއެވެ.
