ޤައުމީ އިދާރާތަކުން ރައްޔިތުންނަށް ފޯރުކޮށްދޭ ޚިދުމަތްތައް ލާމަރުކަޒީ އުޞޫލުން އެއް ފުރާޅެއްގެ ދަށުން ފޯރުކޮށްދިނުމުގެ މަޤްޞަދުގައި، ”ސަރުކާރުގެ ޚިދުމާތު މަރުކަޒު“ ގެ ނަމުގައި ޚާއްޞަ އިދާރާތަކެއް އުފެއްދެވިކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އިޢުލާން ކުރައްވައިފިއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން އުފެއްދެވި މި މަރުކަޒުތަކަކީ މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީގެ ދަށުން ހިންގަމުންދާނެ އިދާރާތަކެއްގެ ގޮތުގައި ވަނީ ހަމަޖައްސަވާފައެވެ.
ރައީސުލްޖުމްހޫރިއްޔާގެ އޮފީހުން ނެރުއްވި ދެންނެވުމުގައިވާ ގޮތުން، މި ނިންމެވުމާއެކު ހއ. އަތޮޅުން ފެށިގެން ގދ. އަތޮޅާއި ހަމައަށް ޖުމްލަ 18 އަތޮޅެއްގައި ”ސަރުކާރުގެ ޚިދުމަތު މަރުކަޒު“ ތައް ޤާއިމުކުރެވިގެންދާނެއެވެ.
މި މަރުކަޒުތައް އުފެއްދެވުމުގެ މައިގަނޑު ބޭނުމަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 65 ވަނަ މާއްދާގެ (ށ) ގެ 1 ގައި ބަޔާންކޮށްފައިވާ ގޮތުގެ މަތިން، އިންޓަގްރޭޓަޑް ސަރވިސް ސެންޓަރުތަކެއް މެދުވެރިކޮށް ރައްޔިތުންނަށް ފަސޭހަކަމާއެކު ޚިދުމަތްތައް ފޯރުކޮށްދިނުމެވެ.
މީގެއިތުރުން، އެ ދެންނެވުމުގައި މި މަރުކަޒުތަކަށް އިނގިރޭސިބަހުން ބޭނުންކުރާނެ ރަސްމީ ނަންތަކާއި، ދައުލަތުގެ އިދާރާތަކުން ސިޓީ މުޢާމަލާތް ކުރުމުގައި ބޭނުންކުރާނެ މުއައްސަސާ ނަންބަރުތައް ހަމަޖައްސަވާފައިވާ ގޮތުގެ ތަފްޞީލުވެސް ވަނީ ހިމަނުއްވާފައެވެ.
