ދައުލަތުގެ ބޮޑެތި ދަރަނިތައް އަދާކޮށް މާލީ ހަމަޖެހުން ގާއިމުކުރުމަށް ސަރުކާރުން އެޅި ހަރުދަނާ ފިޔަވަޅުތަކާއެކު، ބައިނަލްއަޤްވާމީ ކްރެޑިޓް ރޭޓިންގ އެޖެންސީ މޫޑީޒްއިން ރާއްޖޭގެ ސޮވެރިން ކްރެޑިޓް ރޭޓިންގ ”Caa2“ އިން ”Caa1“ އަށް މަތިކޮށްފިއެވެ. މިއީ ސަރުކާރުގެ މާލީ އިސްލާހީ ސިޔާސަތުތަކުގެ އެދެވޭ ނަތީޖާ ފެންނަން ފެށުމުގެ ސަބަބުން ލިބުނު މުހިންމު ކުރިއެރުމެކެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ބުނި ގޮތުގައި، މޫޑީޒްގެ މި ނިންމުމަކީ ކައިރި މުސްތަގުބަލެއްގައި ރާއްޖެއަށް ދަރަނި ނުދެއްކިދާނެކަމުގެ ނުރައްކާ ބޮޑުތަނުން ކުޑަވެފައިވާކަން ވަޒަންކުރުމަށްފަހު ނިންމި ނިންމުމެކެވެ. އަދި މާލީ ހާލަތު ރަނގަޅުކުރުމަށް ސަރުކާރުން ތަންފީޒުކުރަމުންދާ ސިޔާސަތުތަކުގެ ކާމިޔާބީ އެ އިދާރާއިން ވަނީ ފާހަގަކޮށްފައެވެ.
މި ރޭޓިންގ މަތިވެފައިވަނީ ދައުލަތުން އަދާކުރަންޖެހޭ މުހިންމު ދަރަނިތަކެއް ކާމިޔާބުކަމާއެކު ދައްކައި ނިންމުމާ ގުޅިގެންނެވެ. އެގޮތުން 2026 ވަނަ އަހަރުގެ އެޕްރީލް މަހު 500 މިލިއަން ޑޮލަރުގެ ސުކޫކު ދައްކައި ހަލާސްކުރުމުގެ އިތުރުން 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއަށް ވަނީ ފައިސާ ދައްކާފައެވެ. މީގެ އިތުރުން، މެއި އަދި ސެޕްޓެމްބަރު މަހު ޖުމްލަ 100 މިލިއަން ޑޮލަރުގެ ޓްރެޜަރީ ބިލް ދައްކާފައިވާއިރު، 100 މިލިއަން ޑޮލަރުގެ ޔޫރޯ ބޮންޑް އަނބުރާ ދެއްކުމުގެ މުއްދަތު 2031 އަށް އިތުރުކުރުމުން ދަރަނި ދެއްކުމަށް އޮތް ތާށިކަމަށް ބޮޑު ލުޔެއް ވަނީ ލިބިފައެވެ.
ދައުލަތުގެ ބޭރު ފައިސާގެ ރިޒާވް ވަރުގަދަކުރުމަށާއި ސޮވެރިން ޑިވެލޮޕްމަންޓް ފަންޑަށް ފައިސާ ޖާމާކުރުމަށް ކުރެވުނު މަސައްކަތްތަކީވެސް ކްރެޑިޓް ރޭޓިންގ މަތިވުމަށް މަގުފަހިވި ކަންކަމެވެ. 2024 ވަނަ އަހަރު ތައާރަފުކޮށް، 2026 ގައި ފުޅާކުރެވުނު ބޭރު ފައިސާގެ ސިޔާސަތުތަކުގެ ސަބަބުން ރާއްޖެއަށް ވަންނަ ބޭރު ފައިސާގެ މިންވަރު އިތުރުވެ، ރަސްމީ ރިޒާވާއި ސޮވެރިން ޑިވެލޮޕްމަންޓް ފަންޑު އިތުރަށް ވަރުގަދަވާނެ ކަމަށް ބެލެވެއެވެ.
ރާއްޖޭގެ މާލީ ހާލަތު ރަނގަޅުކުރުމަށް ބައިނަލްއަޤްވާމީ ތަރައްޤީގެ ބައިވެރިންގެ ފަރާތުންވެސް ބޮޑު އެހީތެރިކަމެއް ލިބިފައިވެއެވެ. އެގޮތުން ވޯލްޑް ބޭންކުން 40 މިލިއަން ޑޮލަރު، އޭޝިއަން ޑިވެލޮޕްމަންޓް ބޭންކު (އޭޑީބީ) އިން 50 މިލިއަން ޑޮލަރު އަދި އޯޕެކް ފަންޑުން 40 މިލިއަން ޑޮލަރާއެކު ޖުމްލަ 130 މިލިއަން ޑޮލަރުގެ މާލީ އެހީތެރިކަން ސަރުކާރުން ވަނީ ހޯދާފައެވެ.
ސަރުކާރުން އެޅި އިޤްތިޞާދީ ފިޔަވަޅުތަކުގެ ނަތީޖާ ދައުލަތުގެ ދަރަނީގެ ހިސާބުތަކުންވެސް ސާފުކޮށް ފެންނަން އެބައޮތެވެ. 2025 ވަނަ އަހަރުގެ ނިޔަލަށް އުފެއްދުންތެރިކަމުގެ ނިސްބަތުން ދަރަނި 129.2 އިންސައްތައިގައި ހުރި ނަމަވެސް، 2026 ވަނަ އަހަރުގެ ޖުލައި މަހުގެ ނިޔަލަށް އެ ނިސްބަތް ވަނީ 122.6 އިންސައްތައަށް ދަށްކުރެވިފައެވެ.
މި ކާމިޔާބީތައް ހާސިލުކުރެވުނީ މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލުން ފަދަ ބައިނަލްއަޤްވާމީ އިޤްތިޞާދީ ގޮންޖެހުންތަކުގެ ތެރޭގައެވެ. އެފަދަ ހާލަތެއްގައިވެސް ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށާއި، އިޤްތިޞާދީ ހަރަކާތްތައް ކުރިއެރުވުމަށާއި، ދައުލަތުގެ ޚަރަދުތައް ބަޖެޓުގެ އިމުގެ ތެރޭގައި ހިފެހެއްޓުމަށް ސަރުކާރުން ވަނީ އިސްކަންދީފައެވެ.
ދަރަނި ނުދެއްކުމުގެ ނުރައްކާ ކުޑަކުރެވިފައިވާއިރު، އިޤްތިޞާދީ ދެމެހެއްޓެނިވިކަން ކަށަވަރުކޮށް، ދައުލަތުގެ މާލީ ހާލަތު އިތުރަށް ވަރުގަދަކުރުމުގައި މި ހޯދި ކުރިއެރުން ދެމެހެއްޓުމަކީ ސަރުކާރުގެ އެންމެ މުހިންމު އަމާޒު ކަމުގައި ފިނޭންސް މިނިސްޓްރީން ހާމަކުރެއެވެ.
