މާލޭގެ ސޯސަންމަގުގައި ބާރު ސްޕީޑުގައި ދުއްވި ސައިކަލެއް އެހެން ސައިކަލެއްގައި ޖެހި ހިނގި ނުރައްކާތެރި އެކްސިޑެންޓެއްގައި އިމިގްރޭޝަން އޮފިސަރަކު މަރުވި މައްސަލައިގައި، ސައިކަލު ދުއްވަން އިން ޒުވާނާ ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފިއެވެ.
މި މައްސަލައިގައި ޝަރީއަތް ނިމެންދެން ބަންދުކުރަން ގާޒީ އިބްރާހީމް ޒިހުނީ އަމުރުކުރެއްވީ ތ. ދިޔަމިގިލި، އަސޭރިގެ، އުމުރުން 21 އަހަރުގެ މާހު ހަސަންގެ މައްޗަށެވެ. އޭނާ ހައްޔަރުކޮށް ފުރަތަމަ ދިން 15 ދުވަހުގެ ބަންދުގެ މުއްދަތު ހަމަވުމުން ކޯޓަށް ހާޒިރުކުރުމުން ގާޒީ ވަނީ އޭނާގެ ބަންދާމެދު ގޮތެއް ނިންމަވާފައެވެ.
މިދިޔަ މަހުގެ 20 ވަނަ ދުވަހުގެ މެންދަމުގެ ވަގުތެއްގައި ހިނގި މި އެކްސިޑެންޓުގައި މާހު ސައިކަލު ދުއްވާފައިވަނީ ސޯސަންމަގުން ބާރު ސްޕީޑުގައި ޒިގްޒެގްކޮށް ކަމަށް ކޯޓު ލިޔެކިޔުންތަކުން އެނގެއެވެ. މި ހާދިސާގައި ދެ ސައިކަލުގައި ތިބި ޖުމްލަ ތިން މީހަކަށް އެކިވަރުގެ އަނިޔާތައް ލިބުނެވެ.
އެކްސިޑެންޓުގައި އަނެއް ސައިކަލުގެ ފަހަތުގައި އިން ށ. ފޯކައިދޫ، މަގުމަތީގެ، އައިޝަތު މަހީދާ (26އ) ގެ ބޮލަށް ސީރިއަސް އަނިޔާތަކެއް ލިބި، އޭޑީކޭ ހޮސްޕިޓަލުގެ އައިސީޔޫގައި ހަތަރު ދުވަސް ވަންދެން ފަރުވާ ދެމުން ދަނިކޮށް ނިޔާވީ މިދިޔަ މަހުގެ 25 ވަނަ ދުވަހުއެވެ. މޯލްޑިވްސް އިމިގްރޭޝަނާ ގުޅުނުތާ ނުވަ މަސް ދުވަސް ވެފައިވާ މަހީދާ ނިޔާވީ ލިބުނު އަނިޔާތަކަށް ފަރުވާ ދެމުން ދަނިކޮށެވެ.
ކޯޓުގެ ލިޔެކިޔުންތަކުން އެނގޭ ގޮތުގައި މާހު ސައިކަލު ދުއްވާފައިވަނީ އެއްގަމު އުޅަނދު ދުއްވުމުގެ ލައިސަންސް ނެތިއެވެ. އަދި މި އަހަރުގެ ތެރޭގައި ވެސް ލައިސަންސް ނެތި ދުއްވައިގެން ހަތަރު ފަހަރެއްގެ މަތިން ފުލުހުން އޭނާ ހިފަހައްޓައި ޖޫރިމަނާކޮށްފައިވާކަން ވަނީ ހާމަވެފައެވެ.
މި މައްސަލައިގެ ފުރަތަމަ އަޑުއެހުމުގައި އޭނާއަށް ވެސް އަނިޔާވި ކަމަށް ބުނެ ބަންދަށް ލުޔެއް ދިނުމަށް އެދުނު ނަމަވެސް، ވަކީލަކު ހަމަޖައްސަން މާހު އިންކާރުކުރުމުން، ވަކީލަކު ނެތި ދައްކާ ވާހަކަތައް އޭނާއާ ދެކޮޅަށް ހެއްކެއްގެ ގޮތުގައި ބޭނުންކުރެވިދާނެ ކަމަށާއި ހަނުހުރުމުގެ ހައްގު ލިބިގެންވާކަން ގާޒީ ވަނީ ހަނދާންކޮށްދެއްވާފައެވެ.
ގާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ގާނޫނުގެ ދަށުން އޭނާ ޝަރީއަތް ނިމެންދެން ބަންދުކުރަން ނިންމެވީ، ތަކުރާރުކޮށް ލައިސަންސް ނެތި ނުރައްކާތެރިކޮށް ދުއްވާ މީހަކަށް ވާތީ މުޖުތަމައުގެ ސަލާމަތަށް ނުރައްކަލެއް އޮތް ކަމަށް ފެންނާތީއެވެ.
އެއްގަމު ދަތުރުފަތުރުގެ ގާނޫނުގައިވާ ގޮތުން ފަރުވާކުޑަކޮށް ދުއްވައިގެން މީހަކަށް އަނިޔާއެއް ލިބިއްޖެ ނަމަ ނުވަތަ މީހަކު މަރުވެއްޖެ ނަމަ 100،000 ރުފިޔާއާއި 500،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ. މީގެ އިތުރުން ޖިނާއީ އިޖުރާއަތުގެ ދަށުން ޖިނާއީ ދައުވާ އުފުލުމަށް މި ގާނޫނު ހުރަހެއް ނުއަޅައެވެ.
