ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ދިނުމަށް ހަމަޖެހިފައިވާ ”އެފްއޭއެމް އެވޯޑްސް“ ގައި ހޮވާ، އަހަރުގެ އެންމެ މޮޅު އަންހެން ފުޓުބޯޅަ ކުޅުންތެރިޔާގެ މަގާމަށް ވާދަކުރާ ކުޅުންތެރިންގެ ނޮމިނޭޝަން ލިސްޓު ރަސްމީކޮށް އިއުލާނުކޮށްފިއެވެ.
މި އެވޯޑުގެ ނޮމިނޭޝަން ލިސްޓުގައި ހިމެނެނީ މާޒިޔާ ސްޕޯޓްސް އެންޑް ރެކްރިއޭޝަނުގެ ދެ ކުޅުންތެރިންނާއި، ނިއުރޭޑިއަންޓް ސްޕޯޓްސް ކުލަބުގެ ދެ ކުޅުންތެރިންގެ އިތުރުން އޮޑި ސްޕޯޓްސް ކުުލަބުގެ ކުޅުންތެރިއެކެވެ.
އޮޑި ސްޕޯޓްސް ކުލަބުން މި ޝަރަފުވެރި އެވޯޑަށް ނޮމިނޭޓުވެފައިވަނީ، ޤައުމީ ފުޓްސަލް ޓީމުގެ ކެޕްޓަންގެ އިތުރުން ޤައުމީ ފުޓުބޯޅަ ޓީމުގެ ކެޕްޓަންކަން ވެސް ކޮށްފައިވާ ތަޖުރިބާކާރު ކުޅުންތެރިޔާ ފާތިމަތު ޝާލިޔާއެވެ. ޝާލިޔާ ވަނީ މިދިޔަ އަހަރު ބޭއްވި އެފްއޭއެމް ވިމެންސް ލީގުގައި މޮޅު ކުޅުމެއް ދައްކައި، މުބާރާތުގެ އެންމެ މޮޅު ދިވެހި ކުޅުންތެރިޔާގެ މަގާމު ވެސް ހޯދާފައެވެ.
ލީގުގެ ޗެމްޕިއަންކަން ހޯދި މާޒިޔާ ސްޕޯޓްސް އެންޑް ރެކްރިއޭޝަނުން މި އެވޯޑަށް ނޮމިނޭޓުވީ ޤައުމީ ޓީމުގައި ވެސް މުހިންމު ދައުރެއް އަދާކުރަމުން އަންނަ އައިމިނަތު ލީޒާ އަދި ޝަޙްފާ ޝިއުތުއެވެ. މީގެ އިތުރުން، ނިއުރޭޑިއަންޓް ސްޕޯޓްސް ކުލަބުން މި އެވޯޑަށް ވާދަކުރަނީ މަރިޔަމް ނޫރާގެ އިތުރުން ޤައުމީ އަންހެން ފުޓުބޯޅަ ޓީމުގެ މިހާރުގެ ކެޕްޓަން މައީޝާ އަބްދުލް ހަންނާނެވެ.
ރާއްޖޭގައި ކުލަބު ފެންވަރުގައި އަންހެނުންގެ ފުޓުބޯޅަ މެދުކެނޑިފައި އޮންނަތާ ގިނަ އަހަރުތަކަކަށް ފަހު، މިދިޔަ އަހަރު އެފްއޭއެމް އިން ވަނީ ”އެފްއޭއެމް ވިމެންސް ލީގު“ ގެ ނަމުގައި ކާމިޔާބު މުބާރާތެއް ބާއްވައި، ރާއްޖޭގެ އަންހެން ފުޓުބޯޅައަށް އައު ދިރުމަކާއި އުންމީދެއް ގެނެސްދީފައެވެ. ފޯރިގަދަ ކުޅުމަކަށްފަހު އެ މުބާރާތުގެ ތަށި މާޒިޔާ އިން އުފުލައިލީ ފައިނަލުގައި އޮޑި ސްޕޯޓްސް ކުލަބުގެ މައްޗަށް ކުރިހޯދައިގެންނެވެ.
މި އެވޯޑުތަކުގެ ސަބަބުން ރާއްޖޭގެ އަންހެން ފުޓުބޯޅަ ކުޅުންތެރިންގެ މެދުގައި އޮތް ވާދަވެރިކަން އިތުރުވެ، ކުޅިވަރުގެ ފެންވަރު އިތުރަށް މަތިވެގެންދާނެ ކަމަށް ބެލެވެއެވެ.
