އިންޑިއާގެ ދިއްލީގެ އުތުރުއިރުމަތީ ސީމާޕުރީ ސަރަހައްދުގައި ހުރި ހަތަރު ބުރީގެ އިމާރާތެއް ވެއްޓި، ކުޑަކުއްޖަކާއި ބަނޑަށް ހަތަރު މަހުގެ އަންހެނަކު ހިމެނޭހެން ތިން މީހުން މަރުވެއްޖެއެވެ.
މިއަދު ހިނގި މި ހާދިސާގައި މަރުވި މީހުންގެ ތެރޭގައި ހިމެނެނީ އުމުރުން 21 އަހަރުގެ ގުލަފްސާ ނާމަކަށް ކިޔާ ބަނޑުބޮޑު އަންހެނަކާއި، އުމުރުން 12 އަހަރުގެ އަންހެން ކުއްޖެއްގެ އިތުރުން އެހެން ކުޑަކުއްޖެކެވެ. މީގެ ތެރެއިން ދެ ކުދިންގެ ވަނީ ކާކުކަން ދެނެގަނެވިފައެއް ނުވެއެވެ. ޑީސީޕީ ރާޖެންދުރަ ޕްރަސާދް މީނާ ބުނި ގޮތުގައި މަރުވި ކުދިންގެ ތެރެއިން އެއް ކުއްޖެއްގެ ބޯ ވަނީ ހަށިގަނޑާ ވަކިވެފައެވެ.
އިމާރާތުގެ ކުނިބުނިތަކުގެ ދަށުން މިހާތަނަށް އަށް މީހަކު ސަލާމަތްކޮށްގެން ތާހިރުޕޫރުގައި ހުންނަ ރާޖީވް ގާންދީ ސޫޕާ ސްޕެޝަލިޓީ ހޮސްޕިޓަލަށް ފަރުވާއަށް ވަނީ ގެންގޮސްފައެވެ. ސަލާމަތްކުރެވުނު މީހުންގެ ތެރޭގައި މޮމިން މިރްޖާ (56 އަހަރު)، އަބްދާން (3 އަހަރު)، އަބްދުލް ރަހްމާން (28 އަހަރު)، ދެވްރުއްދީން (28 އަހަރު)، ސަލްމާ (50 އަހަރު)، ޗޯޓޭ (34 އަހަރު)، ސަކީނާ (35 އަހަރު) އަދި ސަމަދު (30 އަހަރު) ހިމެނެއެވެ.
ދިއްލީ ފަޔަރ ސަރވިސްއަށް މި ހާދިސާގެ ރިޕޯޓު މެންދުރުފަހު 3:30 ހާއިރު ލިބުމާއެކު، ފަޔަރ އެންޖިންތައް އެ ސަރަހައްދަށް ފޮނުވައިގެން ހޯދުމާއި ސަލާމަތްކުރުމުގެ މަސައްކަތް ވަނީ ފަށާފައެވެ.
މި ހާދިސާ ހިނގި ސަރަހައްދުގައި ތިބި އާންމުން ވަނީ ރެސްކިއު ޓީމުތައް އައުމުގެ ކުރިން އަމިއްލައަށް އިމާރާތުގެ ގާތައް ދުރުކޮށް، ސަލާމަތީ މަސައްކަތްތަކުގައި ބައިވެރިވެފައެވެ. އާންމު ރައްޔިތަކު ބުނި ގޮތުގައި ފުލުހުންނަށް އާދެވުނީ ހާދިސާ ހިނގިތާ ބައިގަޑިއިރު ފަހުންނެވެ. އަދި އާންމުންގެ އެހީތެރިކަމާއެކު ބައެއް މީހުން ސަލާމަތްކޮށް، ސީޕީއާރު ދީގެން ހޮސްޕިޓަލަށް ފޮނުވާފައިވާ ކަމަށްވެސް އޭނާ ބުންޏެވެ.
ދިއްލީ ޓްރެފިކް ފުލުހުން ވަނީ ސީމާޕުރީ ގޯލް ޗައްކަރު އަދި ޑީއެލްއެފް ބޯޕުރާ ސަރަހައްދުގެ މަގުތަކުގައި ޓްރެފިކަށް ބާރުބޮޑުވެފައިވާތީ، އެމްބިއުލަންސްތަކާއި ސަލާމަތީ އުޅަނދުތަކަށް މަގުފަހިކޮށްދިނުމުގެ ގޮތުން އެ ސަރަހައްދަށް އާންމުން ނުދިއުމަށާއި މަގުމައްޗަށް އެއްނުވުމަށް އިލްތިމާސްކޮށްފައެވެ.
އާންމުން ބުނާ ގޮތުގައި އެ އިމާރާތުގައި ރެނދުލާފައިވަނީ އުއްތަރާކަންޑަށް އަންގާރަ ދުވަހުގެ ރޭ އައި ބޫމިކަމްޕާ ގުޅިގެން ދިއްލީ ސަރަހައްދަށް ގުޑުން އެރުމުގެ ސަބަބުންނެވެ. ނަމަވެސް އިމާރާތް ވެއްޓެން މެދުވެރިވި ހަގީގީ ސަބަބު އެނގޭނީ ތަހުގީގަށްފަހު ކަމަށް އޮފިޝަލުން ބުނެއެވެ.
މި ހާދިސާ ހިނގާފައިމިއީ ދިއްލީގެ ސަތުޔާ ނިކޭތަންގައި ހުރި ހޮސްޓެލް އިމާރާތެއް ވެއްޓި ހަތް މީހުން މަރުވި ހާދިސާއަށް މަހެއްހާ ދުވަސް ވެފައިވަނިކޮށެވެ.
