މަސްތުވާތަކެތީގެ މައްސަލައެއްގައި 25 އަހަރުގެ ޖަލު ހުކުމެއް ތަންފީޒު ކުރަމުންދަނިކޮށް ޤާނޫނާ ހިލާފަށް އަބްދުﷲ އިބްރާހީމް (އަބުޗާ) ޕެރޯލްގެ ދަށުން ދޫކޮށްލި މައްސަލަ ރައްޔިތުންގެ މަޖިލީހުގެ ކަމާބެހޭ ކޮމިޓީ މެދުވެރިކޮށް ތަހުގީގުކޮށްދިނުމަށް އެދި މަޖިލީހަށް ހުށަހަޅައިފިއެވެ.
މި މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. މެންބަރު ފޮނުއްވި ސިޓީގައި ވަނީ ޕެރޯލް ދިނުމުގައި އަމަލުކުރި އިޖުރާއަތްތައް ބެލުމަށާއި، އެ ނިންމުމުގައި ބައިވެރިވި ޕެރޯލް ބޯޑުގެ ހުރިހާ މެންބަރުން ކޮމިޓީއަށް ހާޒިރުކޮށް ސުވާލުކުރުން މުހިންމު ކަމަށް ފާހަގަކުރައްވާފައެވެ.
އޭގެ އިތުރުން ޝަރުތު ހަމަވާކަން ކަނޑައެޅުމަށް ބެލި ލިޔެކިޔުންތަކާއި ބޭނުންކުރި މިންގަނޑުތައް ބެލުމުގެ އިތުރުން، 25 އަހަރުގެ ހުކުމެއް އޮތް މީހަކަށް ތިން ބައިކުޅަ އެއް ބައި ހަމަވި ކަމަށް ނިންމި ގޮތުގެ ގާނޫނީ އިޖުރާއަތް ސާފުކުރުމަށްވެސް މެންބަރު ވަނީ އެދިވަޑައިގެންފައެވެ. އަދި މިއީ ވަކި މައްސަލައެއްގައި ދިމާވި އިޖުރާއީ ގޯހެއްތޯ ނުވަތަ ނިޒާމީ ގޮތެއްގައި ހިނގަމުންދާ ކަމެއްތޯއާއި، މިފަދަ ގޮތަކަށް އިތުރު ކުށްވެރިންތަކެއް ދޫކުރެވިފައިވޭތޯ ބެލުމަށްވެސް ސިޓީގައި އެދިވަޑައިގެންފައިވެއެވެ.
މެންބަރު ކުޑޫ ވިދާޅުވީ ވެރިކަން ހިންގުމުގެ ބާރުގެ ފަރާތުން ކުރާ ކަންތައްތައް ހިނގާނުހިނގާ ގޮތް ބެލުމާއި ޖަވާބުދާރީ ކުރުވުމަކީ ރައްޔިތުންގެ މަޖިލީހުގެ ދުސްތޫރީ ވާޖިބެއް ކަމަށެވެ. އެހެންކަމުން މި މައްސަލަ އަވަސް މުއްދަތެއްގެ ތެރޭގައި ތަހުގީގުކޮށްދިނުމަށް އޭނާ ވަނީ އެދިވަޑައިގެންފައެވެ.
މި މައްސަލަ މަޖިލީހަށް ހުށަހެޅިއިރު، އަބުޗާ އަށް ގާނޫނާ ހިލާފަށް ޕެރޯލް ދިން މައްސަލައިގައި ޕެރޯލް ބޯޑުގެ ހުރިހާ މެންބަރުން ވަނީ ވަކިކޮށްފައެވެ. އަދި އޭނާއަށް ދިން ޕެރޯލް އުވާލައި، އަލުން ވަނީ ޖަލަށް ގެންގޮސްފައެވެ.
ހޯމް މިނިސްޓަރު އަލީ އިހުސާން ވިދާޅުވި ގޮތުގައި އަބުޗާގެ މައްޗަށް އިއްވާފައިވާ 12 އަހަރާއި ހަ މަހުގެ ތިން ހުކުމަށް ބަލާއިރު ޕެރޯލަށް އެދެވޭނީ ހަ އަހަރާއި ތިން މަސް ހަމަވުމުންނެވެ. ނަމަވެސް ބޯޑުން މުއްދަތު ގުނުމުގައި އަމަލުކޮށްފައިވަނީ ގާނޫނާ ހިލާފަށް ކަމަށް މިނިސްޓަރު ވިދާޅުވިއެވެ.
