ޕާސްޕޯޓް ބުކްލެޓުގެ އައު ސްޓޮކް ލިބި، އަންނަ ހަފުތާއިން ފެށިގެން ކުރިއެކޭ އެއްގޮތަށް އާންމު އުސޫލުން ޕާސްޕޯޓު ދޫކުރަން ފަށާނެ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
މޯލްޑިވްސް އިމިގްރޭޝަނުން މައުލޫމާތު ދެއްވި ގޮތުގައި، ޕާސްޕޯޓް ބުކްލެޓްގެ އައު ސްޓޮކް އަންނަ ހަފުތާގެ ތެރޭގައި ރާއްޖެއަށް ލިބޭނެއެވެ. އަދި ސްޓޮކް ލިބުމާއެކު، ކުރިން ދިމާވި ދަތިތަކަށް ހައްލު އައިސް، ކުރިއެކޭ އެއްގޮތަށް ޕާސްޕޯޓު ދޫކުރުމުގެ މަސައްކަތް އަލުން ފެށިގެންދާނެއެވެ.
މި މައްސަލައާ ގުޅިގެން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ރޭ ވިދާޅުވެފައިވަނީ، ޕާސްޕޯޓު ލިބުމުގައި ދިމާވި ދަތިތަކަށް އަންނަ ހޮނިހިރު ދުވަހުން ފެށިގެން ދާއިމީ ހައްލެއް ލިބިގެންދާނެ ކަމަށެވެ.
ދިވެހި ޕާސްޕޯޓް ދޫކުރުމުގެ އުސޫލަށް އިމިގްރޭޝަނުން ވަގުތީ ބަދަލުތަކެއް ގެނައީ މިދިޔަ އޮގަސްޓު މަހުގެ 27 ވަނަ ދުވަހުއެވެ. އެ ބަދަލު ގެންނަން ޖެހުނީ ރާއްޖެއަށް ޕާސްޕޯޓް ބުކްލެޓް ފޯރުކޮށްދޭ ޖަރުމަނުވިލާތުގެ ކުންފުނީގެ ޕްރިންޓް ހައުސް މެޝިންތަކަކަށް ދިމާވި ޓެކްނިކަލް މައްސަލަތަކެއް ހައްލުވި ނަމަވެސް، ރާއްޖެއަށް ބުކްލެޓް ލިބުމުގައި ދަތިތަކެއް ކުރިމަތިވުމާ ގުޅިގެންނެވެ.
އެ ދަތިތަކާ ގުޅިގެން އިމިގްރޭޝަނުން ނިންމާފައި އޮތީ ރާއްޖޭގައި ތިބެގެން ޕާސްޕޯޓުގެ މުއްދަތު ހަމަވެގެން އައު ޕާސްޕޯޓަށް އެދޭ ފަރާތްތަކުގެ ޕާސްޕޯޓުގެ މުއްދަތު، އައު ޕާސްޕޯޓެއް ދޫކުރުމުގެ ބަދަލުގައި 30 ޖޫން 2027 ގެ ނިޔަލަށް އިތުރުކޮށްދިނުމަށެވެ. އަދި އަލަށް ޕާސްޕޯޓް ހައްދާ މީހުންގެ ތެރެއިން އިންޑިއާ އަދި ސްރީލަންކާ ފަދަ ޤައުމުތަކަށް ކުރު މުއްދަތަކަށް ދަތުރުކުރާ ފަރާތްތަކަށް ދޫކުރަމުން ދިޔައީ ”އިމަޖެންސީ ޕާސްޕޯޓް“ އެކެވެ.
ނަމަވެސް، އަންނަ ހަފުތާގައި އައު ސްޓޮކް ލިބި ޚިދުމަތް އާންމު ހާލަތަށް ރުޖޫޢަވުމުން، އިމަޖެންސީ ޕާސްޕޯޓު ދޫކުރާނީ ހަމައެކަނި ޚާއްޞަ އިމަޖެންސީ ހާލަތްތަކުގައި އެކަންޏެވެ. މީގެއިތުރުން، ޕާސްޕޯޓުގެ މުއްދަތު އިތުރުކޮށްދީފައިވާ ފަރާތްތަކާމެދު ދެން އަމަލުކުރާނެ އުސޫލުތައް ވެސް އަންނަ ހަފުތާގެ ތެރޭގައި ރަސްމީކޮށް އިއުލާން ކުރައްވާނެ ކަމަށް އިމިގްރޭޝަނުން ވަނީ ބުނެފައެވެ.
