ރަޝިޔާގެ ތެޔޮ ސާފުކުރާ ކާރުޚާނާތަކުގެ 51 އިންސައްތައަށްވުރެ ބޮޑު ބައެއް ޔޫކްރެއިންގެ ޑްރޯން ޙަމަލާތަކުގައި ހަލާކުކޮށްލާފައިވާކަމަށް ޔޫކްރެއިންގެ ޑިފެންސް މިނިސްޓްރީއިން ބުނެފިއެވެ.
މިކަން އިޢުލާނުކޮށްފައިވަނީ، ރަޝިޔާގެ މޮސްކޯ ސަރަޙައްދުގައި ހުންނަ އެންމެ ބޮޑު ތެޔޮ ރައްކާކުރާ މަރުކަޒު ކަމަށްވާ ވޮލޮޑާސްކް ފެސިލިޓީއަށް ޔޫކްރެއިންގެ ޑްރޯންތަކުން ވަރުގަދަ ޙަމަލާތަކެއް ދީފައިވާ ދަނޑިވަޅެއްގައެވެ.
ޔޫކްރެއިންގެ ޑިފެންސް މިނިސްޓަރ ޔެވްހެނީ ޚްމާރާ ބުނީ، ރަޝިޔާގެ ތެޔޮ ސާފުކުރާ ކާރުޚާނާތަކުގެ 51 އިންސައްތަ ހަލާކުކޮށްލެވިފައިވާ ކަމަށާއި، މިއީ ރަޝިޔާގެ އިޤްތިޞާދަށާއި ސިފައިންނަށް ތެޔޮ ފޯރުކޮށްދިނުމަށް ލިބުނު ވަރަށް ބޮޑު ގެއްލުމެއް ކަމަށެވެ. ރަޝިޔާގެ ރައީސް ޕޫޓިންވެސް ވަނީ މި ޙަމަލާތަކުގެ ސަބަބުން ރަޝިޔާގެ އިޤްތިޞާދަށް ގެއްލުންވެ، ޖީޑީޕީގެ 1 އިންސައްތަ ދަށްވެފައިވާކަމަށް އެއްބަސްވެފައެވެ.
ރަޝިޔާއިން ބުނާގޮތުގައި ޔޫކްރެއިންގެ 199 ޑްރޯނެއް އެމީހުން ވަނީ ވައްޓާލާފައެވެ. ނަމަވެސް މޮސްކޯއާ 40 ކިލޯމީޓަރު ދުރުގައި ހުންނަ ވޮލޮޑާސްކް މަރުކަޒަށް ޙަމަލާ އަރައި ވަނީ އަލިފާން ރޯވެފައެވެ. މިއީ އަހަރަކު 3 މިލިއަން ޓަނުގެ ތެޔޮ އުފައްދާ ތަނެކެވެ. އަދި މޮސްކޯގެ ބޮޑެތި އެއަރޕޯޓުތަކަށް ހޮޅި މެދުވެރިކޮށް ތެޔޮ ފޯރުކޮށްދެނީވެސް މި މަރުކަޒުންނެވެ.
