ރަސްމާލެ މަޝްރޫޢަކީ ރާއްޖެއަށް އަންނާނެ އެންމެ ބޮޑު އިންވެސްޓްމަންޓް ކަމަށާއި، މި މަޝްރޫޢު ކާމިޔާބުކަމާއެކު ނިމިގެން ދިއުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެވަނަ ދައުރެއް ކާމިޔާބު ކުރައްވާނެ މައިގަނޑު ސަބަބަށް ވެގެންދާނެ ކަމަށް ޖަޕާނަށް ކަނޑައަޅުއްވާފައި ހުންނަވާ ސަފީރު އަޙްމަދު މަހުލޫފް ވިދާޅުވެއްޖެއެވެ.
ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި މިރޭ ވާހަކަ ދައްކަވަމުން މަހުލޫފް ވިދާޅުވީ، ރަސްމާލެ މަޝްރޫޢާ ދެކޮޅަށް އިދިކޮޅު ސިޔާސީ ފަރާތްތަކުން ބިރުގަންނަނީ މިއީ ޙަޤީޤަތަކަށް ހެދުމުގެ ފުރިހަމަ ޤާބިލުކަން ހުރި ކުންފުންޏަކާ ހަވާލުކޮށްގެން ކުރިއަށްގެންދާ މަޝްރޫޢަކަށްވާތީ ކަމަށެވެ. އަދި މިއީ ވަކި ސިޔާސީ ފިކުރަކަށް ބެލުމެއްނެތި، ކޮންމެ ދިވެހި ރައްޔިތަކަށްވެސް އެއިން ނުހަނު ބޮޑު ފައިދާއެއް ލިބިގެންދާނެ ތަރައްޤީގެ ބޮޑު މަޝްރޫޢެއް ކަމަށް އޭނާ ފާހަގަކުރެއްވިއެވެ.
މަހުލޫފް ވިދާޅުވި ގޮތުގައި 20 ބިލިއަން ޑޮލަރުގެ މިފަދަ ބޮޑު އިންވެސްޓްމަންޓެއް ރާއްޖެއަށް ގެނެވުމުން، އޭގެ ސަބަބުން 50،000 އަށްވުރެ ގިނަ ވަޒީފާގެ ފުރުޞަތު އުފެދި، ދިވެހި ކުންފުނިތަކަށާއި ރައްޔިތުންނަށް އިޤްތިޞާދީ ގޮތުން ބޮޑެތި ކުރިއެރުންތަކެއް ލިބިގެންދާނެއެވެ. އަދި މެދުއިރުމަތީގެ މަޝްރޫޢުތަކަށް ސަމާލުކަންދޭ ބޮޑެތި އިންވެސްޓަރުންގެ ޝައުޤުވެރިކަންވެސް މި މަޝްރޫޢަށް ލިބެމުންދާކަން އޭނާ ހާމަކުރެއްވިއެވެ.
އިދިކޮޅު ފަރާތްތަކުން މި މަޝްރޫޢު ހުއްޓުވުމަށް ނުވަތަ އަގުވައްޓާލުމަށް މަސައްކަތް ކުރި ނަމަވެސް، މި މަޝްރޫޢުގެ އަމަލީ މަސައްކަތްތައް ކުރިއަށްގޮސް ކާމިޔާބުވާނެ ކަމުގެ 100 އިންސައްތަ ޔަޤީންކަން އެބައޮތް ކަމަށް މަހުލޫފް ވިދާޅުވިއެވެ. އަދި ކުރިއަށް އޮތް ތަނުގައި އަންނަން އޮތް ސަރުކާރުތަކުންވެސް މި މަޝްރޫޢު ހުއްޓާނުލައި، އިތުރު އެއްބާރުލުންދީގެން ކުރިއަށްގެންދާނެ ކަމަށް ޤަބޫލުކުރައްވާ ކަމަށްވެސް އޭނާ ވިދާޅުވިއެވެ.
