ތިލަފުށީގައި ހުންނަ ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ފެސިލިޓީން ހިދުމަތް ދޭނީ، ކަނޑައެޅިފައިވާ މިންގަނޑުތަކާ އެއްގޮތަށް ކުނި ގިންތިކޮށް ވަކިކޮށްގެން ގެންނަ އުޅަނދުފަހަރަށް އެކަނި ކަމަށް އެ ކޯޕަރޭޝަނުން ހާމަކޮށްފިއެވެ.
ވެމްކޯއިން މިކަން ހާމަކޮށް ނެރުނު ބަޔާނުގައި ބުނެފައިވަނީ، ތިލަފުށީ ރީޖަނަލް ވޭސްޓް މެނޭޖްމަންޓް ފެސިލިޓީއަށް ކުނި ގެނައުމާއި ހިދުމަތް ދިނުމުގެ އުސޫލުގައި ކުނި ވަކިކުރުމަށް ލާޒިމުކޮށްފައިވީ ނަމަވެސް، ގިނަ އުޅަނދުފަހަރުން އެއްވެސް ތަރުތީބެއް ނެތި ކުނި އެއްކޮށްގެން ގެންނަކަން ފާހަގަކުރެވިފައިވާ ކަމަށެވެ. އަދި މިކަމުގެ ސަބަބުން ރައްކާތެރިކަމާއެކު ކުނި ނައްތާލުމުގެ މަސައްކަތަށް ބޮޑެތި ގޮންޖެހުންތަކާ ކުރިމަތިލާންޖެހޭ ކަމަށްވެސް އެ ކޯޕަރޭޝަނުން ބުނެފައިވެއެވެ.
ކަންމިހެން އޮތުމުން ތިލަފުށީ ފެސިލިޓީއަށް ގެންނަ ކުނި ހުންނަންވާނީ ގަސްކުނި، ބަދިގެ ކުނި، ޕްލާސްޓިކް، ދަގަނޑު، ލަކުނޑި، ބިއްލޫރި އަދި އެހެނިހެން ބާވަތްތަކަށް ވަކިވަކިން ގިންތިކުރެވިފައި ކަމަށް ވެމްކޯއިން ވަނީ ބުނެފައެވެ. މީގެއިތުރުން، އުޅަނދުފަހަރަށް ކުނި ބަރުކުރުމުގައި ޖަމްބޯ ބޭގު ނުވަތަ ކާގޯ ނެޓު ބޭނުންކުރުމަށް ހާއްސަ ސަމާލުކަމެއް ދިނުމަށްވެސް އިލްތިމާސްކޮށްފައިވެއެވެ.
މިފަދައިން އަމަލުކުރުމަކީ އުޅަނދުތަކުން ކުނި ބޭލުމަށް ހޭދަވާ ވަގުތު ކުޑަވެ، ހިދުމަތް ދޭ ފަރާތަށާއި ހިދުމަތް ލިބިގަންނަ ފަރާތްތަކަށްވެސް ލިބޭނެ ބޮޑު ލުޔެކެވެ. ހަމައެއާއެކު، މޫދަށް ކުނި އެޅުން ފަދަ ތިމާވެށްޓަށް ގެއްލުންހުރި ކަންކަމުން ރައްކާތެރިވުމަށްވެސް މިކަމުގެ ސަބަބުން މަގުފަހިވެގެންދާނެއެވެ.
ވެމްކޯއިން އިތުރަށް ބުނީ، މި އުސޫލުތަކާ ހިލާފަށް ތިލަފުއްޓަށް ކުނި ގެންނަ ފަރާތްތަކަށް އެއްވެސް ހިދުމަތެއް ނުދެވޭނެ ކަމަށާއި، މި ފިޔަވަޅަކީ ކަނޑައެޅިފައިވާ ގަވާއިދުތަކަށް އާންމުން އަހުލުވެރިކުރުވައި އެ އުސޫލުތައް ތަންފީޒުކުރުމަށް ބާރުއެޅުމުގެ ގޮތުން އަޅާފައިވާ ފިޔަވަޅެއް ކަމަށެވެ.
