މާލޭގެ އެންމެ ކާރޫބާރު ބޮޑު 2 މަގު ކަމަށްވާ އަމީނީ މަގާއި ބޮޑުތަކުރުފާނު މަގު ތަރައްގީކޮށް، މަރާމާތު ކުރުމުގެ މަސައްކަތުގެ ދަށުން އަމީނީ މަގުގެ 3 ވަނަ ސެގްމަންޓްގެ މަސައްކަތް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިފިއެވެ.
މި މަސައްކަތުގެ ދަށުން، ޢިއްޒުއްދީން ހިނގުމުން ފެށިގެން ކޯރުކެނޑި ހިނގުމާ ހަމައަށް ހިމެނޭ ސެގްމަންޓް 3 ގެ 1,924.77 އަކަމީޓަރުގެ ސަރަހައްދެއްގައި ހުރި ތާރު ނަގައި، އަލުން އޭބީސީ ލޭޔާއާއި ތާރުއެޅުމަށް ވަނީ ހަމަޖެހިފައެވެ. އެމްޓީސީސީން ބުނެފައިވާ ގޮތުގައި، ސެގްމަންޓް 3 ގެ މަސައްކަތް ނިމުމުން، ކޯރުކެނޑި ހިނގުމުން ޤިޔާސުއްދީން އިންޓަރނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ މަސައްކަތްތައް ވެސް ކުރިއަށްދާނެއެވެ. މި ސެގްމަންޓްގައި 1,148.91 އަކަމީޓަރުގެ ސަރަހައްދެއްގައި މަގު މަރާމާތުކޮށް، މަގުމަތީގެ ނިޝާންތައް ކުރެހުމުގެ މަސައްކަތް ކުރުމަށް ވަނީ ހަމަޖެހިފައެވެ.
މި މަޝްރޫއު އެމްޓީސީސީއާ ހަވާލުކޮށްފައިވަނީ މިދިޔަ ޖޫން މަހުގެ ތެރޭގައެވެ. އެ ކުންފުނިން ވަނީ ސެގްމަންޓް 1 އަދި 2 ގެ މަސައްކަތްތައް އެއްކޮށް ނިންމައި، އެ ސަރަހައްދު އާންމު ދަތުރުފަތުރަށް ހުޅުވާލާފައެވެ.
މީގެ އިތުރުން މާލޭގެ ބޮޑުތަކުރުފާނު މަގުގެ ބައެއް ސަރަހައްދުތައް މަރާމާތުކުރުމަށްޓަކައި ރޭ ދަންވަރު 12:00 އިން ފެށިގެން އެ މަގު ބަންދުކޮށްފައިވާ ކަމަށްވެސް ދިވެހި ފުލުހުންގެ ހިދުމަތުން ވަނީ ހާމަކޮށްފައެވެ. މިއަދު އެ ސަރަހައްދުގެ މަގުހެދުމުގެ މަސައްކަތް ފެށުމަށް ރާވާފައިވާތީ، ތާޖުއްދީން ހިނގުމާއި އަމީނީ މަގާ ދެމެދުގައި އޮންނަ ބޮޑުތަކުރުފާނު މަގުގެ ބައި، އައިޖީއެމްއެޗާއި ދަރުމަވަންތަ ހޮސްޕިޓަލް ހިމެނޭ ސަރަހައްދު ވަނީ ބަންދުކޮށްފައެވެ.
މި މަޝްރޫއުގެ ދަށުން ސުނާމީ ބިނާއިން ފެށިގެން އެމްޕީއެލްއާ ހަމައަށް މަގު ތަރައްގީކުރުމުގެ މަސައްކަތް ކުރިއަށްގެންދާނެއެވެ. މި މަޝްރޫއުތަކުގެ ސަބަބުން މާލޭގެ ރައްޔިތުންނަށް ދަތުރުފަތުރުކުރުމުގައި ލުއިފަސޭހަވެ، މާލެއަކީ ފަސޭހައިން ދަތުރުކުރެވޭނެ ގޮތަށް ތަރައްގީކުރެވިފައިވާ ސިޓީއަކަށް ވެގެންދާނެ ކަމަށް ސަރުކާރުން ދެކެއެވެ.
