މާލެއާއި ހުޅުމާލޭގައި ދިރިއުޅޭ އާންމު ރައްޔިތުންނަށް އިމާރާތްކުރުމަށް ބޭނުންކުރާ ކުނި ނުވަތަ ގާކުނޑި އުކާލުމުގައި ދިމާވަމުންދިޔަ ދަތިތަކަށް ހައްލެއް ހޯދައިދިނުމުގެ ގޮތުން، އަމިއްލަ އުޅަނދުފަހަރުގައި އެއްވެސް ލިމިޓެއް ނެތި ގާކުނޑި އުކާލެވޭނެ އިންތިޒާމު ވެސްޓް މެނޭޖްމަންޓް ކޯޕަރޭޝަން (ވެމްކޯ) އިން ހަމަޖައްސައިފިއެވެ.
މިއަދުން ފެށިގެން އަމަލުކުރަން ފެށި މި އުސޫލުގެ ދަށުން، އާންމުންނަށް އެމީހުންގެ އަމިއްލަ ވެހިކަލްތަކުގައި ވެމްކޯގެ މާލެ އަދި ހުޅުމާލޭގެ ރިސޯސް ރިކަވަރީ ފެސިލިޓީތަކަށް ގާކުނޑި ގެންގޮސްގެން އުކާލުމުގެ ފުރުސަތު މިހާރު ވަނީ ހުޅުވާލާފައެވެ.
ވެމްކޯއިން މަޢުލޫމާތު ދޭ ގޮތުގައި މި ބަދަލު ގެންނަން ނިންމީ ގާކުނޑި އުކާލުމުގައި ދިމާވާ ދަތިތަކާ ގުޅިގެން އާންމު ރައްޔިތުންގެ ފަރާތުން އެ ކޯޕަރޭޝަނަށް ގިނަ އަދަދެއްގެ ޝަކުވާތައް ލިބެމުންދިއުމާ ގުޅިގެންނެވެ. އެހެންކަމުން މި ޚިދުމަތް ކުރިއަށްވުރެ ހަލުވިކޮށް އަދި ލުއިފަސޭހަކަމާއެކު ފޯރުކޮށްދިނުމަކީ މި ބަދަލުގެ މައިގަނޑު މަޤްޞަދެވެ.
ނަމަވެސް، އަމިއްލަ އުޅަނދުތަކުގައި ފެސިލިޓީތަކަށް ގެންދާ ގާކުނޑި ހުންނަންވާނީ އެ ކޯޕަރޭޝަނުން ކަނޑައަޅާފައިވާ ޚާއްޞަ އުސޫލުތަކާ އެއްގޮތަށް ވަކިކޮށްފައި ކަމަށް ވެމްކޯއިން ވަނީ ހާމަކޮށްފައެވެ.
މި ގެނެވުނު އާ ބަދަލާއެކު މާލެ ސަރަހައްދުގައި އިމާރާތްކުރުމުގެ މަސައްކަތްތަކުން އުފެދޭ ކުނި ނައްތާލުމުގައި އާންމުންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.
