ރާއްޖެއަކީ ތަރައްގީވެފައިވާ ގައުމަކަށް ހެދުމަށް ކުރާ މަސައްކަތުގައި ޒުވާނުން އަމިއްލައަށް އިސްނަގަންޖެހޭ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ގޮވާލައްވައިފިއެވެ.
ނައިބު ރައީސް މިކަމަށް ގޮވާލެއްވީ، މިއަހަރުގެ ވިލާ ކޮލެޖުގެ ”ސްޓޫޑެންޓް އެޗީވްމަންޓް އެވޯޑްސް“ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. އެ މަނިކުފާނުގެ ވާހަކަފުޅުގައި، ދަސްވެނިވި ދަރިވަރުން ހާސިލުކުރި އިލްމާއި ހުނަރުގެ ބޭނުން ހިފައިގެން، ގައުމީ ތަރައްގީއަށް މުހިންމު ދާއިރާތަކުން އީޖާދީ ހައްލުތައް ހޯދުމަށް އިސްކަންދިނުމުގެ މުހިންމުކަން ފާހަގަކުރެއްވިއެވެ. ހާއްސަކޮށް، މުޅި މުޖުތަމައަށް ދިމާވެފައިވާ ގޮންޖެހުންތަކަށް ދެމެހެއްޓެނިވި ހައްލުތަކެއް ހޯދުމަށް ދަރިވަރުންގެ ފިކުރާއި ވިސްނުން އަމާޒުކުރަންޖެހޭ ކަމަށާއި، ދަރިވަރުން އެ މަގަށް މަސައްކަތްކުރާނެ ކަމުގެ ފުރިހަމަ ޔަގީންކަން އެބައޮތް ކަމަށް ވިދާޅުވިއެވެ.
މީގެއިތުރުން، ދަސްވެނިވި ބައެއް ދަރިވަރުންނަކީ މިހާރުވެސް އަމަލީ މައިދާނުގައި ޒިންމާދާރު މަގާމުތައް ފުރަމުންދާ ފަރާތްތައްކަން ފާހަގަކުރައްވަމުން، އަލަށް ވަޒީފާގެ ބާޒާރަށް ނުކުންނަ ދަރިވަރުންނާއެކު، މުއައްސަސާތަކުގެ ހިދުމަތުގެ ފެންވަރު މަތިކުރުމަށް އެ ދަރިވަރުންގެ އީޖާދީ ވިސްނުމުގެ ބޭނުން ހިފުމަށް ނައިބު ރައީސް ބާރުއެޅުއްވިއެވެ. ދިވެހިރާއްޖެ ތަރައްގީވެފައިވާ ގައުމަކަށް ހެދުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވުރަކީ ކޮންމެ ދިވެހި ރައްޔިތެއްގެވެސް އުންމީދާ ގުޅިފައިވާ ކަމެއްކަން ފާހަގަކުރައްވައި، އެ ލަނޑުދަނޑި ހާސިލުކުރުމުގައި ޒުވާނުން އިސްނަގައިގެން ކުރިއަށް ނުކުތުމަށް ނައިބު ރައީސް ވަނީ އިލްތިމާސްކުރައްވައިފައެވެ.
”ރައީސް ވަނީ މި ތަސައްވުރަށް ވާސިލުވުމަށް މަސައްކަތް ފަށާފައި. އެއީ، 2040 ވަނަ އަހަރު ދިވެހިރާއްޖެ ފުރިހަމައަށް ތަރައްގީވެފައިވާ ގައުމަކަށް ހެދުމުގެ ތަސައްވަރު. މި ތަސައްވުރު ހާސިލުކުރަން ތިޔަ އެންމެހާ ބޭފުޅުންގެ އެހީތެރިކަން ބޭނުންވޭ. ހާއްސަކޮށް ޒުވާނުން އިސްނަގައިގެން އީޖާދީ ވިސްނުންތައް ބޭނުން ކުރައްވައިގެން މި މަސައްކަތުގައި އަމިއްލަފުޅަށް ބައިވެރިވާނެ.“ – ނައިބު ރައީސް ވިދާޅުވިއެވެ.
ތައުލީމީ ނިޒާމުގެ މުހިންމުކަން ފާހަގަކުރައްވަމުން ނައިބު ރައީސް ވިދާޅުވީ، ގިނަ އަދަދެއްގެ ދަރިވަރުން ދަސްވެނިވެގެންދާތަން ފެނުމަކީ ގައުމަށް ދިމާވެފައިވާ މައްސަލަތައް ހައްލުކުރުމަށް ދޭ އަހައްމިއްޔަތު ފެނިގެންދާ ކަމެއް ކަމަށެވެ. އެ މަނިކުފާނު ވަނީ، ކުރިމަގުގައި މަސައްކަތް ކުރާއިރު ޒަމާނީ ވަސީލަތްތަކަށާއި ހުނަރުވެރިކަމަށް އިސްކަންދިނުމަށް ގޮވާލައްވައިފައެވެ.
ނައިބު ރައީސްގެ ވާހަކަފުޅު ނިންމަވާލެއްވީ، ވިލާ ކޮލެޖުން ހޯދާފައިވާ ކުރިއެރުންތަކާއި ކާމިޔާބީތައް ފާހަގަކުރައްވަމުންނެވެ. އަދި ކޮލެޖުގެ ބާނީ ޤާސިމް އިބްރާހީމް އަދި ކޮލެޖުގެ ވެރިން ކުރައްވާ މަސައްކަތް ފާހަގަކޮށް އެކަމަށް ޝުކުރު އަދާކުރެއްވިއެވެ.
