އެމްޑީޕީގެ ކޮންގްރެސްގެ ތެރެއިން ފެނިގެންދަނީ ސިޔާސީ ”އެގްޒިބިޝަނެއް“ ކަމަށާއި، އެއީ ސަރުކާރުން ގެންނަމުންދާ ބޮޑެތި އިންވެސްޓްމަންޓްތަކުގެ ކުލަ ކަނޑުވާލުމަށް ކުޅޭ ސިޔާސީ ޑްރާމާއެއް ކަމަށް ހުޅުދޫ ދާއިރާގެ މެންބަރ މުޙައްމަދު ޝާހިދު ވިދާޅުވެއްޖެއެވެ.
ޝާހިދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގެ ކޮންގްރެސްއިން އަނެއްކާވެސް ފެނިގެންދަނީ ރައީސް މުޙައްމަދު ނަޝީދުގެ ރިޔާސީ ކެމްޕޭނުގައި ދެއްކެވި ފަދަ ހުވަފެނީ ”މެނިފެސްޓޯ“ ޑްރާމާއެއް ކަމަށެވެ. އަދި ރައްޔިތުންނަށް އަބަދުވެސް ދައްކަނީ ކުލަކުލައިގެ ޕްރޮޕޯސަލްތައް ކަމަށާއި، ނަމަވެސް އެއިން ލިބެނީ ސިފަ ނުވާ ބިލާހެއް ކަމަށް އޭނާ ފާހަގަކުރެއްވިއެވެ.
އިންވެސްޓްމަންޓް ފޯރަމެއްގެ ނަމުގައި ކައުންސިލަރުން ލައްވައި ޕްރެޒެންޓޭޝަންތައް ދެއްކެވީ ހަމައެކަނި އެމްޑީޕީގެ އަމިއްލަ ޕާޓީގެ އެކްޓިވިސްޓުންނަށް ކަމަށް ޝާހިދު ވިދާޅުވިއެވެ. އަދި އެ ފޯރަމްގައި އިންވެސްޓަރުން ތިބީ ކޮން ތަނެއްގައިތޯ ސުވާލު އުފައްދަވަމުން، މިއީ ހަގީގީ އިންވެސްޓްމަންޓް ފޯރަމެއް ނޫން ކަމަށާއި، މިއީ ހަމައެކަނި ސިޔާސީ އެގްޒިބިޝަނެއް ކަމަށް އޭނާ ވިދާޅުވިއެވެ.
މީގެއިތުރުން، މި ކުޅިގަނޑަކީ ސަރުކާރުން ގެނެސްފައިވާ ބިޔަ އިންވެސްޓްމަންޓްތައް ހަޖަމް ނުކުރެވިގެން، ކޮންގްރެސްގައި ހުވަފެނުގެ ޕްރޮޕޯސަލްތައް ހުށަހަޅައިގެން ސަރުކާރުގެ ބޮޑެތި އިންވެސްޓްމަންޓްތަކުގެ ކުލަ ކަނޑުވާލުމަށް ކުޅޭ ކުޅިގަނޑެއް ކަމަށްވެސް އޭނާ ވިދާޅުވިއެވެ.
މިފަދަ ޑްރާމާތަކުގެ ހަގީގަތް މިއަދު ރައްޔިތުންނަށް ރަނގަޅަށް އެނގޭނެ ކަމަށްވެސް ޝާހިދު ވަނީ ވިދާޅުވެފައެވެ.
