އެމްޑީޕީއަށް އާރާއި ބާރާއި އޮތް އިރުވެސް ކައުންސިލްތަކަށް އިންވެސްޓް ހޯދައި ނުދެވުނުކަމަށާއި، މިހާރު އެ ބާރު ނެތްއިރު ވަކި އިންވެސްޓް ހޯދޭނެތޯ ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު، ސުވާލު އުފައްދަވައިފިއެވެ. ޝުޖާއު މިކަން ހާމަކުރެއްވީ ސޯޝަލްމީޑިއާގައި ކުރެއްވި ޕޯސްޓެއްގައެވެ.
ޝުޖާއު ފާހަގަކުރެއްވި ގޮތުގައި، 19 ވަނަ މަޖިލީހުން 2010 ވަނަ އަހަރުގެ ލާމަރުކަޒީ ގާނޫނަށް (ގާނޫނު ނަންބަރު 7/2010) ބޮޑެތި ބަދަލުތަކެއް ގެނެސް، ކައުންސިލްތަކަށް ގިނަ ބާރުތަކެއް ދިނެވެ. އޭގެ ފަހުން އައި ކައުންސިލް އިންތިހާބުގައި ގިނަ ރަށު ކައުންސިލްތަކެއް އެމްޑީޕީން ހޯދިއެވެ. އެ ދުވަސްވަރު ސަރުކާރާއި، މަޖިލީހާއި، މުޅި ސިސްޓަމް އޮތީ އެމްޑީޕީގެ މުށުތެރޭގައެވެ.
އެމްޑީޕީގެ ވެރިކަމުގައި ކައުންސިލްތަކަށް ދަރަންޏަށް ޒިންމާވާ ގޮތަށް ލޯނު ނެގުމާއި، ކުންފުނި ހެދުމާއި، ފަޅު ރަށް ދިނުންފަދަ ބޮޑެތި ބާރުތަކެއް ދެވިފައި އޮތް ނަމަވެސް، އެ ވަގުތު ވެރިކަމުގައި އޮތް ޕާޓީގެ ހައިސިއްޔަތުން ކައުންސިލްތަކަށް އިންވެސްޓް ފުރުސަތެއް ހޯދައި ނުދެވުނު ކަމަށް ޝުޖާއު ތުހުމަތުކުރެއްވިއެވެ. މިހާރު އެ ބާރުތައް އެމްޑީޕީއަށް ނެތް އިރު، އިންވެސްޓް ހޯދޭނެ ގޮތަކާމެދު އޭނާ ވަނީ ސުވާލު އުފައްދަވާފައެވެ.
އަޅުގަނޑު ހަމަ ހިތައްއަރާ އެއްޗެއް ދަންނަވާލަން އިނގޭތޯ އުސްތާޛު @waddey_
7/2010 އަށް ބޮޑެތި ބަދަލު ތަކެއް ގެންނެވީ 19ވަނަ މަޖިލީހުން.ބޮޑެތި ބާރުތަކެއް ޤާނޫނުން ދެއްވައި ޖެހިގެން އައި ކައުންސިލް އިންތިޚާބުގައި ގިނަ ރަށު ކައުންސިލްތަކެއް MDP ހޯއްދެވި.ސަރުކާރާ،މަޖިލީހާ އަދި މުޅި…
— Ibrahim Shujau (@IbrahimShujaau) October 3, 2026
ޝުޖާއު ވިދާޅުވީ، ކައުންސިލްތަކަށް ބޮޑެތި ބާރުތަކެއް ގާނޫނުން ދެވުނު އިރުވެސް، އެ ބާރުތައް ނުހިނގާ އޮތީ އެއް ކައުންސިލްގައި ކަމަށެވެ. އެއީ މާލޭ ސިޓީ ކައުންސިލް ކަމަށާއި، އެ ކައުންސިލަށް ސަރުކާރުން ހުރިހާ ކަމެއް އޮތީ އޭރު މަނާކޮށްފައި ކަމަށް ޝުޖާއު ފާހަގަކުރެއްވިއެވެ. އެގޮތުން، ކުންފުނި ހެދުމާއި، ހައުސިންގ ޕްރޮޖެކްޓްތައް (ޕްރޮޖެކްޓް ފައިނޭންސްއާއެކު ގެނައުމަށް ވެސް)، އަދި ރައްޔިތުން އެދޭ ބޮޑެތި މަޝްރޫއުތައް ހިންގުމަށް ދަރަންޏަށް ޒިންމާވާ ގޮތަށް ލޯނު ނެގުން ފަދަ ކަންކަން އެމްޑީޕީ ސަރުކާރުން މާލޭ ސިޓީ ކައުންސިލަށް މަނާކުރިކަމަށް އޭނާ ވިދާޅުވިއެވެ. އޭރު މާލެސިޓީ ކައުންސިލްގައި އޮތީ އޭރުގެ އިދިކޮޅު ޕީޕީއެމްގެ މެޖޯރިޓީއެވެ.
މިކަންކަމަށް އިޝާރާތް ކުރައްވައި ޝުޖާއު ވިދާޅުވީ، އެމްޑީޕީން އިއްޔެ ބޭއްވި ޕާޓީގެ އިންވެސްޓް ފޯރަމަކީ އެމްޑީޕީ ކައުންސިލްތަކަށް ކުރާ މަލާމާތެއް ކަމަށް އޭނާގެ ބުއްދި ބުނާ ކަމަށެވެ. ކައުންސިލްތަކަށް މާލީ ބާރުވެރިކަން ހޯދައިދިނުމަށް 19 ވަނަ މަޖިލީހުގައި ގަރާރު ހުށަހަޅުއްވައި، ލާމަރުކަޒީ ގާނޫނަށް ގެނައި ބަދަލުތަކުގެ ބަހުސްތަކުގައި ފުޅާކޮށް ވާހަކަދެއްކެވި ފަރާތްތަކުގެ ތެރެއިން ގިނަ ބޭފުޅުން އެ ފޯރަމުން ފެނިފައި ނުވާތީ، އެމްޑީޕީގެ މިހާރުގެ އަމަލުތަކާމެދު ޝުޖާއު ވަނީ ސުވާލު އުފައްދަވާފައެވެ.
