މާލޭގެ ޓްރެފިކް ބެލެހެއްޓުމާއި ޕާކިންގ ގަވާއިދުތައް ހަރުދަނާކުރުމަށް ކުރަމުން އަންނަ މަސައްކަތްތަކުގެ ދަށުން ބޮޑުތަކުރުފާނު މަގުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް ޓޯކުރުމުގެ މަސައްކަތް ދިވެހި ފުލުހުންގެ ހިދުމަތުން ފަށައިފިއެވެ.
މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން ބޮޑުތަކުރުފާނު މަގު ފުޅާކޮށް، އަލުން ހަދާފައިވާއިރު، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މަގުގައި އުޅަނދު ޕާކުކުރުން ވަނީ މަނާކޮށްފައެވެ. ނަމަވެސް، މި ގަވާއިދުތަކަށް ބޯނުލެނބުމުގެ ސަބަބުން، ގަވާއިދާ ހިލާފަށް ޕާކުކުރާ އުޅަނދުތަކުގެ މައްސަލަ ވަނީ ގިނަވެފައެވެ.
މިކަމާ ގުޅިގެން ފުލުހުން ރޭ ބުނީ، ގަވާއިދާ ހިލާފަށް ބޮޑުތަކުރުފާނު މަގުގައި ޕާކުކޮށްފައިވާ އުޅަނދުތައް ޓޯކުރުމުގެ މަސައްކަތް ކުރިއަށްދާ ކަމަށެވެ. މި މަސައްކަތުގެ ދަށުން މިހާތަނަށް ހަތަރު ފުރޮޅުލީ ނުވަ އުޅަނދު ވަނީ ޓޯކޮށްފައެވެ. މަގުމަތީގެ ސަލާމަތާއި އަމަންއަމާންކަން ކަށަވަރުކުރުމަށް ފުލުހުން ކުރިއަށްގެންދާ މި މަސައްކަތް މެދުކެނޑުމެއްނެތި ކުރިއަށްދާނެ ކަމަށް ފުލުހުން ވަނީ މައުލޫމާތު ދީފައެވެ.
މަގުމަތީގައި ގަވާއިދާ ހިލާފަށް އުޅަނދު ޕާކުނުކުރުމަށާއި، އަދި މިހާރުވެސް އެގޮތަށް ޕާކުކޮށްފައިވާ އުޅަނދުތައް ވީހާވެސް އަވަހަކަށް ނެގުމަށް ފުލުހުންވަނީ އިލްތިމާސްކޮށްފައެވެ. މި މަސައްކަތުގައި އާންމު ރައްޔިތުންގެ ފަރާތުން ލިބެމުންދާ ފުރިހަމަ އެއްބާރުލުން ފާހަގަކޮށް، ފުލުހުން ވަނީ ޝުކުރު އަދާކޮށްފައެވެ.
ގަވާއިދާ ހިލާފަށް މަގުމަތީގައި ޕާކުކުރާ މައްސަލަ ހުއްޓުވައި މިކަމަށް އަވަސް ހައްލެއް ގެނައުމަށްޓަކައި ސަރުކާރުން ވެސް އަންނަނީ ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން މާލެ ސަރަހައްދުގައި ޕާކިންގ ޒޯންތައް ތަރައްގީކުރުމުގެ މަސައްކަތްތައް ވެސް އަންނަނީ ހަލުވި ދުވެލީގައި ކުރަމުންނެވެ.
