ދިވެހިރާއްޖޭގެ އިޖުތިމާޢީ އަދި އާންމު އަޚްލާގީ މިންގަނޑުތަކާ ޚިލާފަށް، ނިވާކަން ކުޑަކޮށް ހެދުން އަޅައިގެން އުޅޭ ބިދޭސީންނާމެދު ޤާނޫނީ ގޮތުން އަޅަންޖެހޭ ފިޔަވަޅުތައް އަޅާނެ ކަމަށް ދިވެހި ފުލުހުންގެ ޚިދުމަތުން ހާމަކުރައްވައިފިއެވެ. ފުލުހުން މިކަން ހާމަކުރެއްވީ އެކަމަށް ސަމާލުވުމަށް އިލްތިމާސްކޮށް ނެރުއްވި ބަޔާނެއްގައެވެ.
ފުލުހުންގެ ބަޔާނުގައި ފާހަގަކޮށްފައިވާ ގޮތުގައި، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު ތަންތަނާއި މަގުމައްޗަށް ނުކުމެ އުޅޭއިރު، ދިވެހި މުޖުތަމަޢުގެ އަޚްލާގީ މިންގަނޑުތަކާ ނުގުޅޭ ގޮތަށް ނިވާކަން ކުޑަ ހެދުން އަޅަމުންދާކަން ވަނީ ފާހަގަކުރެވިފައެވެ. އަދި މިފަދަ އަމަލުތަކަކީ މުޖުތަމަޢުގެ ސުލޫކީ މިންގަނޑުތައް ގެއްލި، އަމާންކަމާއި ސުލްހަ މަސަލަސްކަމަށް ނޭދެވޭ އަސަރުތަކެއް ކޮށްފާނެ ކަމެއް ކަމަށްވާތީ، އެފަދަ ހާލަތެއް މެދުވެރިވުމުގެ ކުރިން ފިޔަވަޅު އަޅާނެ ކަމަށްވެސް ފުލުހުން ވިދާޅުވިއެވެ.
#MPSPressStatement: 171-A(C1)/PS/2026/08 – Bidheyseennaai fathuruverin aanmu ijuthimaaee mingan'duthaka eggothah hedhun elhumah ilthimaaskurun https://t.co/CfNqGC1ToI pic.twitter.com/Jd8KQygtbG
— Maldives Police (@PoliceMv) October 2, 2026
ރާއްޖޭގައި ދިރިއުޅޭ ކޮންމެ މީހަކީވެސް މުޖުތަމަޢުގެ އިޖުތިމާޢީ އަދި އަޚްލާގީ ހަމަތައް ހިފެހެއްޓުމުގެ މަސްއޫލިއްޔަތު އޮތް ފަރާތެއްކަން ފާހަގަކުރައްވައި ފުލުހުން ވިދާޅުވީ، ބިދޭސީންވެސް ދިވެހިންގެ ސަގާފަތާއި އިސްލާމީ އާދަކާދަތަކަށް ފުރިހަމައަށް އިހުތިރާމުކުރަން ޖެހޭނެ ކަމަށެވެ. އެހެންކަމުން، ރާއްޖޭގައި މަސައްކަތްކުރާ ބިދޭސީން މިފަދަ ކަންކަމަށް ހޭލުންތެރިކުރުވައި، އެފަދަ އަމަލުތައް ނުފެންނާނެހެން ބެލެހެއްޓުމަށް އެ ފަރާތްތަކުގެ ސްޕޮންސަރުންނަށާއި ވަޒީފާދޭ ފަރާތްތަކަށް ފުލުހުން ވަނީ އިލްތިމާސްކުރައްވާފައެވެ.
މީގެއިތުރުން، ރާއްޖެއަށް ޒިޔާރަތްކުރާ ފަތުރުވެރިންވެސް، އެމީހުންނަށް ޚާއްސަކޮށްފައިވާ ރިސޯޓުތައް ފަދަ ސަރަހައްދުތައް ފިޔަވައި، އާންމުން ދިރިއުޅޭ ރަށްރަށުގެ މަގުތަކާއި އާންމު ތަންތަނުގައި އުޅޭއިރު ރާއްޖޭގެ އަޚްލާގީ މިންގަނޑުތަކަށް އިހުތިރާމުކުރުމަށް ސަމާލުކަން ދިނުމަށް ފަތުރުވެރިކަމުގެ ޚިދުމަތްދޭ ފަރާތްތަކަށްވެސް ފުލުހުން ވަނީ އިލްތިމާސްކުރައްވާފައެވެ.
ފުލުހުންގެ މި ނަސޭހަތާއި އިލްތިމާސްތަކާ ޚިލާފުވެ، އާންމު އިޖުތިމާޢީ މިންގަނޑުތައް ފަހަނައަޅައިދާ ފަރާތްތަކާމެދު ޤާނޫނުގައިވާ ގޮތުގެ މަތިން ހަރުކަށި ފިޔަވަޅު އަޅަމުން ގެންދާނެ ކަމުގެ އިންޒާރު ދިވެހި ފުލުހުންގެ ޚިދުމަތުން ވަނީ ދެއްވާފައެވެ.
