ހުޅުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކޮށްފައިވާ ހައުސިން ޔުނިޓުތަކުގެ ތެރެއިން 564 ފްލެޓަކުން ގަވާއިދުން ކުލި ނުދައްކާ އިރު، އުސޫލާ ހިލާފަށް އެހެން ފަރާތްތަކަށް ކުއްޔަށް ދީގެން އުޅޭ 16 މައްސަލައެއް ފާހަގަކުރެވިގެން އެ ކުންފުނިން ބަލަން ފަށައިފިއެވެ.
ސަރުކާރުގެ ސޯޝަލް ހައުސިން މަޝްރޫއުގެ ދަށުން ދޫކޮށްފައިވާ 4000 ފްލެޓުގެ ތެރެއިން މަހުން މަހަށް ގަވާއިދުން ކުލި ދައްކަމުންދަނީ 3،362 ޔުނިޓުން ކަމަށް އެފްޑީސީން ހާމަކުރެއެވެ. ނަމަވެސް، ގަވާއިދާ ހިލާފަށް ކުއްޔަށް ދޫކޮށްފައިވާ މައްސަލަތަކާ ގުޅިގެން ފަސް ޔުނިޓެއްގެ ވެރިފަރާތް މިހާރު ޖޫރިމަނާކޮށް، ދެ ފްލެޓަކަށް ވަނީ އިސްލާހުވުމުގެ ނޯޓިސް ފޮނުވާފައެވެ.
އެފްޑީސީން އާންމުކުރި ތަފާސްހިސާބުތަކަށް ބަލާއިރު އެންމެ ގިނައިން ހުށަހެޅިފައިވަނީ ހުއްދަނެތި އެޕާޓްމަންޓްތަކަށް ބަދަލުގެނައުމުގެ މައްސަލަތަކެވެ. އެގޮތުން އަމިއްލައަށް ބަދަލުތައް ގެނެސްގެން 28 މައްސަލައެއް ބަލަމުންދާއިރު، އޭގެ ތެރެއިން ފަސް ފަރާތެއް ވަނީ ޖޫރިމަނާކޮށްފައެވެ.
މީގެ އިތުރުން، ގަވާއިދާ ހިލާފަށް ކުނި އަޅައިގެން ތިން މައްސަލައެއް ފާހަގަވެ، އޭގެ ތެރެއިން ދެ މައްސަލައެއްގައި ހިމެނޭ ފަރާތްތަކަށް ވަނީ ފިޔަވަޅު އަޅައި ޖޫރިމަނާކޮށްފައެވެ. އަދި އަންގާ އެންގުންތަކަށް އަމަލުނުކުރުމާއި، އަޑުގަދަވެގެން ހުށަހެޅުނު ޝަކުވާތަކާ ގުޅިގެންވެސް އެ ކުންފުނިން ވަނީ ބަލަންޖެހޭ ކަންކަން ބަލާފައެވެ.
އަމާން އުދަރެސް އަދި އަމާން ދޯދި ފްލެޓުތަކާ ގުޅިގެން އާންމުންގެ ފަރާތުން އެކި ސޫރައިގައި މައްސަލަތައް ހުށަހެޅެމުންދާއިރު، ސޯޝަލް ހައުސިންއަށް ކުލި ނުދެއްކުމުގެ މައްސަލައަކީ އާންމުކޮށް ބޮޑުވަމުންދާ ކަންބޮޑުވުމެކެވެ. ނަމަވެސް، ގަވާއިދާ ހިލާފުވާ ފަރާތްތަކާމެދު ފިޔަވަޅުއެޅުމުގެ މަސައްކަތް އެފްޑީސީން އަންނަނީ ކުރަމުންނެވެ.
