ސަޢޫދީ ޢަރަބިއްޔާގެ މަދީނާގައި ހުންނަ ކަރަންޓު ފޯރުކޮށްދޭ ސްޓޭޝަނަކަށް ޔަމަނުގެ ހޫޘީން ޑްރޯން ޙަމަލާއެއް ދީފައިވާކަމަށް ސަޢޫދީ އިސްކޮށް އޮވެ ހިންގާ ކޯލިޝަނުން ބުރާސްފަތި ދުވަހު ހާމަކޮށްފިއެވެ. ކޯލިޝަނުން ބުނާގޮތުގައި އަންގާރަ ދުވަހު ދިން މި ޙަމަލާ އަމާޒުކޮށްފައިވަނީ، އިސްލާމްދީނުގެ އެންމެ މުޤައްދަސް އެއް ބިނާކަމަށްވާ މަސްޖިދުއް ނަބަވީއަށް ކަރަންޓު ފޯރުކޮށްދޭ ޠައިބާ ޕަވަރ ސްޓޭޝަނަށެވެ.
ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ މައުލޫމާތު ދިން ގޮތުގައި، މި ޙަމަލާ ދީފައިވަނީ އަންގާރަ ދުވަހުގެ ފަތިހު 5:11 ގައެވެ. ޙަމަލާގެ ސަބަބުން ކަރަންޓު ޓްރާންސްފޯމަރަކަށް ގެއްލުންވެ ބޭނުންނުކުރެވޭ ވަރު ވެފައިވީ ނަމަވެސް، މުޅި ކަރަންޓު ވިއުގައަށް އެއްވެސް އަސަރެއް ކޮށްފައެއް ނުވެއެވެ.
ޙަމަލާދިން ޑްރޯންގެ ބައިތައް ތަޙުޤީޤުކުރުމަށްފަހު، މިއީ ހޫޘީންގެ ޙަމަލާއެއްކަން ސަޢޫދީ ސަރުކާރުން ވަނީ ކަށަވަރުކޮށްފައެވެ. ކޯލިޝަނުން ސިފަކުރި ގޮތުގައި، މަސްޖިދުއް ނަބަވީއަށް ކަރަންޓުދޭ ތަނަކަށް ޙަމަލާދިނުމަކީ މުޅި ދުނިޔޭގެ މުސްލިމުންގެ އިޙްސާސްތަކާ ކުޅެ، ރުޅިއެރުވުމަށް ހޫޘީން ގަސްތުގައި ކުރި ކަމެކެވެ. މީގެ ކުރިން މައްކާއަށްވެސް ޙަމަލާދޭން ހޫޘީން މަސައްކަތްކޮށްފައިވާކަން ކޯލިޝަނުން ވަނީ ފާހަގަކޮށްފައެވެ.
