އަމިއްލަ ނަފުސަށް އިތުބާރުކުރާ، ޒިންމާދާރު އަދި ގައުމީ ހިދުމަތަށް ތައްޔާރުވެފައިވާ ޖީލެއް ބިނާކުރުމަކީ، ގައުމުގެ މުސްތަގުބަލަށްޓަކައި ކުރެވޭ އެންމެ އަގުހުރި އެއް އިންވެސްޓްމަންޓް ކަމަށް ހޯމް މިނިސްޓަރު ޢަލީ އިޙުސާން ވިދާޅުވެއްޖެއެވެ.
މިނިސްޓަރު އިޙުސާން މި މޭރުމުން ވިދާޅުވީ، ސަރުކާރުން އިސްނަގައިގެން ކުރިއަށްގެންދާ ”ދިވެހި ވަތަނީ ހިދުމަތް“ ޕްރޮގްރާމަށް އެއް އަހަރު ފުރުމުގެ މުނާސަބަތުގައި، މީސްމީޑިއާ މެދުވެރިކުރައްވައި ހިއްސާކުރެއްވި މެސެޖެއްގައެވެ. މިނިސްޓަރު ފާހަގަކުރެއްވި ގޮތުގައި، މި ޕްރޮގްރާމަކީ ޒުވާނުންގެ ކިބައިގައި ރިވެތި އަހުލާގާއި ސުލޫކު އަށަގަންނުވައި، ކެތްތެރިކަމާއެކު ގޮންޖެހުންތަކާ ކުރިމަތިލުމުގެ ހިތްވަރާއި، ލީޑަރޝިޕް ހުނަރުތަކުގެ އިތުރުން ގައުމީ ލޯބި އާލާކޮށްދޭ މުހިންމު ބިންގަލެކެވެ.
The Maldives National Service is proving to be a truly transformative programme for our youth and our society by building discipline, resilience, leadership, patriotism and essential life skills, while creating real pathways to employment and national service.
A generation that… https://t.co/AH6yKQWkL1
— Minister of Homeland Security, Labour & Technology (@min_mohst) October 1, 2026
މީގެއިތުރުން، ދިރިއުޅުމުގެ އަމަލީ ހުނަރުތައް ދަސްކޮށްދީ، ވަޒީފާގެ ފުރުސަތުތައް ފަހިކޮށްދިނުމާއެކު، މުޖުތަމައަށް ހެޔޮ އަދި އިންގިލާބީ ބަދަލުތަކެއް މި ޕްރޮގްރާމުގެ ދަށުން ގެނެސްދެވިފައިވާކަން މިނިސްޓަރު ފާހަގަކުރެއްވިއެވެ. ހަމައެއާއެކު، ޒުވާނުން ބާރުވެރިކުރުވައި އެމީހުންގެ ގާބިލުކަން އިތުރުކުރުމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ދުރުވިސްނުންފުޅާއި ކުރައްވާ އަގުހުރި މަސައްކަތްޕުޅުތަކަށް ވަޒީރު ވަނީ ޝުކުރުއަދާކުރައްވައި ތަޢުރީފު ކުރައްވާފައެވެ.
”ދިވެހި ވަތަނީ ހިދުމަތް“ ރަސްމީކޮށް އިފްތިތާހުކޮށްދެއްވީ، 1 އޮކްޓޫބަރު 2025 ގައި ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިންގ ސެންޓަރުގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒެވެ.
މިހާތަނަށް މި ޕްރޮގްރާމްގެ ތިން ބެޗަކުން ޖުމްލަ 1,028 ޒުވާނުން ވަނީ ވަތަނީ ހިދުމަތުގެ އަސާސީ ތަމްރީނު ފުރިހަމަކޮށްފައެވެ.
