ތެލަސީމިއާ ބަލި ތަހައްމަލުކުރަމުންދާ ކުދިންނަށް ދައުލަތުން ދެމުން އަންނަ އެލަވަންސް މަހަކު 2،000 ރުފިޔާއަށް ބޮޑުކޮށްފައިވާ ކަމަށާއި، މިހާރު 500 އަށްވުރެ ގިނަ ކުދިންނަށް މި އެލަވަންސް ލިބެމުންދާ ކަމަށް ހެލްތް މިނިސްޓަރު ޤީލާ ޢަލީ މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހެލްތް މިނިސްޓްރީގެ މަސައްކަތްތަކާ ގުޅޭގޮތުން މައުލޫމާތު ދެއްވަމުން މިނިސްޓަރު ޤީލާ ވިދާޅުވީ، ތެލެސީމިއާ ބަލި ތަހައްމަލުކުރަމުންދާ ފަރާތްތަކަށް ހާއްސަ އެލަވަންސެއް ހަމަޖައްސައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވައުދުފުޅެއް ކަމަށެވެ.
އެގޮތުން 1 ޖަނަވަރީ 2026 އިން ފެށިގެން މި ބަލި ތަހައްމަލުކުރާ ފަރާތްތަކަށް އެލަވަންސްގެ ގޮތުގައި 1،000 ރުފިޔާ ދޭން ފެށުނު ނަމަވެސް، ރައީސްގެ ހާއްސަ ނިންމެވުމުގެ ދަށުން އެ އަދަދު މިހާރު 2،000 ރުފިޔާއަށް ބޮޑުކޮށްދެއްވާފައިވާކަން މިނިސްޓަރު ފާހަގަކުރެއްވިއެވެ. އަދި މި ބަދަލާއެކު ރާއްޖޭގައި ތިބި 500 އަށްވުރެ ގިނަ ތެލަސީމިއާ ކުދިންނަށް މި އެލަވަންސް ގަވާއިދުން ލިބެމުންދާކަން މިނިސްޓަރު ވަނީ ފާހަގަކުރައްވައިފައެވެ.
ތެލެސީމިއާ ކުދިންނާއި އެ ކުދިންގެ އާއިލާތަކުގެ ހާލަތު ރަނގަޅުކޮށް، އެކުދިންނަށް އުފާވެރި ދިރިއުޅުމެއް ހޯދައިދިނުމަށް މި ސަރުކާރުން އަންނަނީ ވަރަށް ބޮޑު އިސްކަމެއްދީގެން މަސައްކަތް ކުރަމުންނެވެ. އެގޮތުން، މި ބައްޔަށް ދާއިމީ ފަރުވާއެއް ހޯދައިދިނުމުގެ ގޮތުން ޒަކާތު ފަންޑުގެ އެހީގައި މިހާތަނަށް 28 ކުއްޖަކު ވަނީ ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވައިފައެވެ. އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެފައިވާ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް ބޯންމެރޯ ހެދުމަށް ކޮންމެ ކުއްޖަކަށް އެއް މިލިއަން ރުފިޔާއަށް ވުރެ އިތުރުނުވާނެހެން އަހަރަކު ޖުމްލަ 10 މިލިއަން ރުފިޔާ ސަރުކާރުން އަންނަނީ ހަރަދުކުރަމުންނެވެ.
މިނިސްޓަރު ޤީލާ އިތުރަށް ވިދާޅުވީ، މާލީ އެހީތެރިކަމާއި ބޯންމެރޯ ހެދުމުގެ ހިދުމަތް ފަދަ ކަންކަން ފަހިކޮށްދީގެން ތެލަސީމިއާ ކުދިންނަށް ދިމާވާ ދަތިތަކަށް ލުޔެއް ހޯދައިދިނުމަކީ ސަރުކާރުން އެންމެ އިސްކަންދޭ އެއް މަސައްކަތް ކަމަށެވެ.
