ރައީސް މުހައްމަދު މުއިއްޒުގެ މައްޗަށް އަހުލާގީ ގޮތުން ދަށް ފެންވަރުގެ އަމަލުތަކެއް ކުރެއްވި ކަމަށް ތުހުމަތުކޮށް ’އަދަދު‘ ނޫހުން ގެނެސްދިން ”އައިޝާ“ ޑޮކިއުމެންޓްރީގައި އިންޓަވިއު ދިން ކަމަށް ތުހުމަތުކުރެވޭ އީޝާ އަޝްރަފްގެ މައްޗަށް އުފުލާފައިވާ ގަޒުފުކުރުމުގެ ކުށުގެ ދައުވާގެ ފުރަތަމަ އަޑުއެހުން އަންނަ ހޯމަ ދުވަހަށް ކްރިމިނަލް ކޯޓުން ތާވަލުކޮށްފިއެވެ.
ކްރިމިނަލް ކޯޓުން މި މައްސަލައިގެ ފުރަތަމަ އިބްތިދާއީ އަޑުއެހުން ތާވަލުކޮށްފައިވަނީ އަންނަ ހޯމަ ދުވަހުގެ ހެނދުނު 10:00 އަށެވެ. މި މައްސަލައިގެ އަޑުއެހުންތައް ކުރިއަށްގެންދިއުމަށް ހަމަޖެހިފައިވަނީ އެ ކޯޓުގެ ބީ1 ސެކްޝަނުންނެވެ. އެ ސެކްޝަން ހިންގަވަނީ ގާޒީ އިބްރާހީމް ޒިހުނީއެވެ.
’އަދަދު‘ ނޫހުން މި ޑޮކިއުމެންޓްރީ މިދިޔަ މާޗު މަހުގެ 28 ވަނަ ދުވަހު އާންމުކުރީ، އެ ވާހަކަތައް ކިޔައިދޭ މީހާ ސިއްރުކޮށް އަޑުވެސް ބަދަލުކޮށްގެންނެވެ. އެ ޑޮކިއުމެންޓްރީ ނެރުނުތާ އެއް މަސް ފަހުން ފުލުހުން ތަހުގީގެއް ފަށައި، އެ މައްސަލާގައި އީޝާ ފުލުހަށް ހާޒިރުކުރުމަށްފަހު އޭނާގެ ޕާސްޕޯޓު ވަނީ ހިފަހައްޓާފައެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން އީޝާގެ މައްޗަށް ގަޒުފުކުރުމުގެ ކުށުގެ ދައުވާކޮށް، ކްރިމިނަލް ކޯޓަށް މި މައްސަލަ ހުށަހަޅާފައިވަނީ މިދިޔަ އާދީއްތަ ދުވަހުއެވެ.
މި ސަރުކާރުގައި ރައީސް އޮފީހުގެ ސިޔާސީ ވަޒީފާއެއްގައި ހުއްޓައި އެހެން ދެ މިނިސްޓްރީއަކަށް ބަދަލުކުރުމަށްފަހު، ފަހުން އީޝާ ވަނީ ސަރުކާރުގެ ވަޒީފާއިން ވަކިކޮށްފައެވެ. އެ ޑޮކިއުމެންޓްރީ މައްސަލާގައި އޭނާގެ މައްޗަށް ކުރެވޭ ތުހުމަތުތަކުގެ ދިފާއުގައި ތަހުގީގު ކުރިއަށް ދިޔައިރު ވާހަކަދައްކަން ފުލުހުން ފުރުސަތު ދީފައިނުވާތީ، އީޝާ ވަނީ އެކަމާމެދު ކަންބޮޑުވުން ފާޅުކޮށްފައެވެ.
އެ ޑޮކިއުމެންޓްރީ ހެދުމުގައި ބައިވެރިވިކަމުގެ ތުހުމަތުގައި ’އަދަދު‘ ނޫހުގެ ސީއީއޯ ހުސެއިން ފިޔާޒު މޫސާ އާއި އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓައި، މިދިޔަ މޭ މަހުގެ ތެރޭގައި އެ ދެ މީހުންގެ މައްޗަށްވެސް ޕީޖީ އޮފީހުން ވަނީ ގަޒުފުކުރުމުގެ ކުށުގެ ދައުވާ އުފުލާފައެވެ. ފުލުހުންގެ ތަހުގީގުގައި އެ ދެ މީހުންވެސް މަސްދަރު ހިމާޔަތްކުރުމުގެ ގޮތުން ތިއްބެވީ ހަނެވެ.
ތިލާނެތް މީހާ ބަންދުކޮއްބަލަ