ނައިޖީރިއާގެ ލާގޯސްގައި ދިރިއުޅޭ އުމުރުން 33 އަހަރުގެ ބެންޖަމިން ޑެނިއަލް (ބެން ޑޭންސަރ) ދުނިޔޭގެ ރެކޯޑެއް ގާއިމުކުރުމުގެ މަގުސަދުގައި 168 ގަޑިއިރު ނުވަތަ އެއްކޮށް ހަތް ދުވަސް ވަންދެން ހުއްޓާނުލާ ނަށައިފިއެވެ.
ގިނަ އަދަދެއްގެ އާންމުންނާއި ސަޕޯޓަރުންގެ ކުރިމަތީގައި ލާގޯސްގެ ފްރީޑަމް ޕާކުގައި ކުރިއަށްގެންދިޔަ މި ހަރަކާތުގައި، އޭނާ ކަނޑައެޅި ޓާގެޓަށް ވާސިލްވެފައިވަނީ އަންގާރަ ދުވަހުގެ ފަތިހު 3:00 އެހާކަންހާއިރުއެވެ. އެހެންނަމަވެސް، ޓާގެޓަށް ވާސިލްވުމަށްފަހުވެސް އިތުރު ނުވަ ގަޑިއިރު ވަންދެން، މެދު ނުކެނޑި އޭނާ ވަނީ ނެށުން ކުރިއަށްގެންގޮސްފައެވެ. މި ވަރުގަދަ ހަރަކާތަށްފަހު ވަރަށް ބޮޑަށް ވަރުބަލިވެފައިވާ ބެން ޑޭންސަރ ވަނީ މެޑިކަލް ޗެކަޕްތަކެއް ހެދުމަށް ހޮސްޕިޓަލަށް ގެންގޮސްފައެވެ.
ގިނެސް ވޯލްޑް ރެކޯޑްސްއިން ބީބީސީއަށް ކަށަވަރުކޮށްދީފައިވާ ގޮތުގައި، އެކަކު އެންމެ ދިގު މުއްދަތަކަށް ނެށުމުގެ ރެކޯޑު މުގުރާލުމަށް ބެން ހުށަހެޅި ހުށަހެޅުން އެ ފަރާތަށް ވަނީ ލިބިފައެވެ. ގިނެސްގެ ތަރުޖަމާނަކު ހާމަކުރި ގޮތުގައި ބެންގެ އެޕްލިކޭޝަން މިހާރު އޮތީ އެކްޓިވްކޮށް ކަމަށާއި، ރެކޯޑު ރަސްމީކޮށް ކަށަވަރުކުރުމުގެ ކުރިން ބަލަންޖެހޭ ހެކިތައް ހުށަހެޅުމުން އެ ތަކެތި ރިވިއުކޮށް ވެރިފިކޭޝަން މަރުހަލާ ކުރިއަށްދާނެއެވެ. މި ވަގުތު މި ރެކޯޑު އޮތީ 2023 ވަނަ އަހަރު އުމުރުން 16 އަހަރުގައި 127 ގަޑިއިރު ވަންދެން ނަށައިގެން ރެކޯޑު ހެދި އިންޑިއާގެ ނެށުންތެރިޔާ ސްރުޝްތީ ސުދީރު ޖަގްތާޕްގެ އަތުގައެވެ. އޭނާގެ ނެށުމުގައި މައިގަނޑުކޮށް ބޭނުންކޮށްފައިވަނީ އިންޑިއާގެ ކްލެސިކަލް ނެށުމުގެ ބަޔެއް ކަމަށްވާ ”ކަތަކް“ އެވެ.
މިދިޔަ އަންގާރަ ދުވަހު މި އިމްތިހާނު ފެށި ބެން ޑޭންސަރަކީ ފުރާވަރުގެ އުމުރުން ފެށިގެން، ވޭތުވެދިޔަ 18 އަހަރު ދުވަހު ޕްރޮފެޝަނަލްކޮށް ނަށަމުން އަންނަ މީހެކެވެ. އޭނާގެ މި 168 ގަޑިއިރުގެ ނެށުމުގައި ނައިޖީރިއާގެ ސަގާފީ ނެށުންތަކާއި އިންޓަރނެޓް ކަލްޗާގެ އިތުރުން އެފްރޯބީޓްސް، ފޫޖީ، ޖޭޒް އަދި ޒޫކް ފަދަ ތަފާތު މިއުޒިކް މިއުޒިކްތަކަށް ވަނީ ނަށާފައެވެ. އަދި ނަށަމުންދިޔަ ވަގުތުތަކުގައި ނައިޖީރިއާގެ ތަފާތު ސަގާފީ ހެދުންތައް ކަމަށްވާ ”އަގްބާޑާ“ އާއި ”ޑަޝީކީ“ ފަދަ ހެދުންތައް އޭނާ ވަނީ ބޭނުންކޮށްފައެވެ. 250 އަށްވުރެ ގިނަ އެތުނިކް ގްރޫޕްތައް ހިމެނޭ ނައިޖީރިއާގެ ތަފާތު ސަގާފަތްތައް މި ނެށުމުގެ ތެރެއިން ދައްކުވައިދިނުމަކީ އޭނާގެ ޓީމުގެ ބޮޑު މަގުސަދެކެވެ.
މި އިވެންޓަށް ތައްޔާރުވުމުގެ ގޮތުން ބެން ވަނީ ހާއްސަ ފިޒިކަލް ޓްރޭނިންގތަކެއް ފުރިހަމަކޮށް، ކާބޯހައިޑްރޭޓްސް ގިނައިން ހިމެނޭ ހާއްސަ ޑައިޓަކަށް ބަދަލުވެފައެވެ. ނަށަމުންދިޔަ މުއްދަތުގައި އޭނާއަށް ކޮންމެ ހިނގާ ގަޑިއިރަކަށް ލިބޭ 5 މިނެޓުގެ އަރާމުކުރުމުގެ ވަގުތު އެއްކޮށްގެން، އެއްފަހަރާ ގިނަ އިރުތަކެއް ވަންދެން ނެށުމަށްފަހު ކުޑަ ބްރޭކެއް ނަގަމުންދިޔައެވެ. އެ ވަގުތުތަކުގައި އޭނާ ބޭނުންކުރީ ލުއި ކާނާއާއި ދިޔާތަކެއްޗެވެ. އަދި މުޅި ހަރަކާތް ކުރިއަށްދިޔަ އިރު ސިއްހީ އެހީތެރިންގެ ޓީމެއް އެތަނުގައި ހަރަކާތްތެރިވަމުންދިޔައެވެ.
މި ހަރަކާތް ސޯޝަލް މީޑިއާގައި ލައިވްސްޓްރީމް ކުރުމާ ގުޅިގެން ގިނަ އަދަދެއްގެ ޒުވާނުން ވަނީ ފްރީޑަމް ޕާކަށް އެއްވެ، އޭނާއަށް ސަޕޯޓްދީ، ވީޑިއޯ ނަގައި، އޭނާއާއެކު ނަށާފައެވެ. އެތަނަށް އެއްވި އާންމުން ވަނީ އޭނާގެ ހިތްވަރަށް ވަރަށް ބޮޑަށް ތައުރީފުކޮށްފައެވެ. ގިނަ ދުވަސްތަކެއް ވަންދެން މެދުނުކެނޑި ނެށުމުގެ ސަބަބުން ދެވަނަ ދުވަހު އޭނާގެ ގައިން ވަރުބަލިކަން ފެނުނުކަމުގައި ވީނަމަވެސް، ފަސްވަނަ ދުވަހާ ހަމައަށް ދިޔައިރު އޭނާގެ ހަކަތަ އިތުރުވެ، އަޒުމު ވަރުގަދަވިކަން އެތަނަށް ދިޔަ ސަޕޯޓަރުން ފާހަގަކުރިއެވެ.
ފަހަކަށް އައިސް ނައިޖީރިއާގައި ގިނެސް ދުނިޔޭގެ ރެކޯޑުތައް މުގުރާލުމުގެ ފޯރި ވަނީ ވަރަށް ބޮޑަށް ހިފާފައެވެ. ހާއްސަކޮށް 2023 ވަނަ އަހަރު ނައިޖީރިއާގެ ޝެފް ހިލްޑާ ބާސީ މެދުނުކެނޑި 93 ގަޑިއިރާއި 11 މިނެޓު ވަންދެން ކެއްކުމުގެ ރެކޯޑު ހެދިފަހުން، އެ ގައުމުން ގިނެސް ރެކޯޑަށް ހުށަހަޅާ މީހުންގެ އަދަދު ވަނީ އިންތިހާއަށް އިތުރުވެފައެވެ. ހިލްޑާގެ ރެކޯޑަށްފަހު އެކަނިވެސް އެ ގައުމުން 1،500 އަށްވުރެ ގިނަ އެޕްލިކޭޝަން ގިނެސްއަށް ލިބިފައިވާކަމަށް އެ ފަރާތުން ބުނެއެވެ.
