މާލޭގެ އަމީނީމަގު އަލުން މަރާމާތުކުރުމަށް ހިންގާ މަޝްރޫއުގެ ތެރެއިން، ދެވަނަ ސެގްމެންޓުގައި ތާރުއެޅުމުގެ މަސައްކަތް މުޅިން ނިންމާލާފައިވާ ކަމަށް އެމްޓީސީސީން ހާމަކޮށްފިއެވެ. މި މަސައްކަތް ނިމުމާއެކު އެ ސަރަހައްދު ބޭނުންކުރާ އާންމުންނަށާއި ދުއްވާ ތަކެއްޗަށް ދަތުރުފަތުރުކުރުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށް އެ ކުންފުނިން ބުނެއެވެ.
ދިވެހިރާއްޖޭގެ އަޑުގެ އިމާރާތުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދު މަރާމާތުކުރުމަށްޓަކައި ބަންދުކޮށްފައިވަނީ މިދިޔަ ޖޫން މަހުގެ ފަހުކޮޅުގައެވެ. އެމްޓީސީސީއާ މި މަސައްކަތް ހަވާލުކުރީ އަމީނީމަގުގެ ތާރުގަނޑު އެކި ހިސާބުތަކުން އުފުލި، ބޮޑެތި އަޑިގުޑަންތައް ހެދިގެން ދުއްވާ ތަކެއްޗަށް ނުރައްކާވާ މައްސަލަ ބޮޑުވުމާ ގުޅިގެންނެވެ.
އެމްޓީސީސީން މައުލޫމާތު ދޭ ގޮތުގައި، މި މަޝްރޫއުގެ ފުރަތަމަ ސެގްމެންޓުގައި ތާރުއެޅުމުގެ މަސައްކަތް މި މަހުގެ 19 ވަނަ ދުވަހު ފަށައި ނިންމާލުމަށްފަހު، ދެވަނަ ސެގްމެންޓުގެ ތާރުއެޅުމުގެ މަސައްކަތްވެސް މިހާރު ވަނީ އެއްކޮށް ނިންމާލާފައެވެ.
މަގުގެ މަރާމާތުގެ މަސައްކަތްތައް ކުރިއަށްދާތީ، އެ ސަރަހައްދުން ދަތުރުކުރާ އާންމު ބަހުގެ ޚިދުމަތްވެސް ވަނީ ވަގުތީގޮތުން މެދުކަނޑާލާފައެވެ.
އަމީނީމަގު މީގެ ކުރިން ޒަމާނީ ފެންވަރަށް ތަރައްގީކުރުމުގެ މަޝްރޫއު އާރްޑީސީއާ ހަވާލުކޮށްގެން ފެށީ ޖުލައި 2022 ގައެވެ. ނަމަވެސް، ދައުލަތުގެ ބަޖެޓުން 84 މިލިއަން ރުފިޔާ ހަރަދުކޮށްގެން ހެދި އެ މަގުގެ ތާރުގަނޑު ހަލާކުވެގެން އަލުން މަރާމާތުކުރަން ޖެހުނީ، އެކި ހިސާބުތަކުން ތާރުގަނޑު މައްޗަށް އުފުލި، ދުއްވާ މީހުންނަށް ނުރައްކާތަކާ ކުރިމަތިލާންޖެހުމާ ގުޅިގެންނެވެ.
