ރާއްޖެއަށް ބިދޭސީން މަސްތުވާތަކެތި އެތެރެކުރާ މައްސަލަ އެކީގައި ހުއްޓުވޭނެކަމުގެ ފުރިހަމަ ޔަގީންކަން ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހުސާން ދެއްވައިފިއެވެ.
ވަޒީރު މިހެން ވިދާޅުވީ ސަރުކާރުގެ ސިޔާސަތުތަކާ ގުޅޭގޮތުން އާންމުންނަށް ސުވާލުކުރުމަށް ބޭއްވި ”އަހާ“ ފޯރަމްގައި، ބޯޑަރު ސަރަހައްދުގެ ސެކިއުރިޓީ ވަރުގަދަކުރުމަށް ކުރެވެމުންދާ މަސައްކަތްތަކާ ގުޅޭގޮތުން އާންމު މީހަކު ކުރި ސުވާލަކަށް ޖަވާބުދެއްވަމުންނެވެ.
އިހުސާން ވިދާޅުވި ގޮތުގައި ބޯޑަރުގެ ރައްކާތެރިކަން އިތުރުކުރުމަށްޓަކައި ވެލާނާ އިންޓަނޭޝަނަލް އެއާޕޯޓާއި އައްޑޫ ގަން އިންޓަނޭޝަނަލް އެއާޕޯޓުގައި މިހާރު ވަނީ ބޮޑީ ސްކޭނަރުތައް ބަހައްޓައިފައެވެ. މިއީ ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން އެތެރެކުރަން އުޅޭ މީހުން ދެނެގަތުމަށް އެޅުނު މުހިންމު ފިޔަވަޅެއްކަން އޭނާ ފާހަގަކުރެއްވިއެވެ.
އެގޮތުން އެންމެ ފަހުންވެސް ހަށިގަނޑު ތެރޭގައި މަސްތުވާތަކެތި ފޮރުވައިގެން އެތެރެކުރަން އުޅުނު ނޭޕާލުގެ ދެ މީހަކު ހެއްކާއެކު އަތުލައިގަނެވިފައިވާކަން ވަޒީރު ހާމަކުރެއްވިއެވެ. ކުރިން ނުފެންނަ ގޮތަށް ހުންނަ އުކުޅުތައް ދެނެގަނެވޭނެ ޒަމާނީ ވަސީލަތްތަކާއި އިންތިޒާމުތައް މިހާރު ބޯޑަރުގައި ގާއިމުކުރެވިފައިވާ ކަމަށްވެސް ވިދާޅުވިއެވެ.
މި މައްސަލައަށް ހައްލު ހޯދުމަށް އިތުރު މުވައްޒަފުން މިވަގުތު ބޭނުންނުވާކަން ފާހަގަކުރައްވަމުން އިހުސާން ވިދާޅުވީ، އިންޓެލިޖެންސް މައުލޫމާތުގެ އަލީގައި ކުރިއަށްދާނަމަ ދާގީނާގައާއި ހަށިގަނޑުގައި ފޮރުވައިގެން މަސްތުވާތަކެތި އެތެރެކުރުން އެއްކޮށް ހުއްޓުވޭނެ ކަމަށެވެ.
މީގެއިތުރުން، މަސްތުވާތަކެތި އެތެރެކުރާ މީހުންނަށް ދެވޭ އަދަބުތައް ވަރުގަދަކުރެވިފައިވާކަން ވަޒީރު ފާހަގަކުރެއްވިއެވެ. އެގޮތުން ވަކި މިންވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭގޮތަށް ގާނޫނަށް ގެނެވުނު އިސްލާހާއެކު، މިފަދަ ޖަރީމާތައް ހިންގަން މީހުން ފަސްޖެހޭނެކަމަށް ގަބޫލުކުރައްވާކަމަށްވެސް އިހުސާން ވިދާޅުވިއެވެ.
