ސިންގަޕޫރުގެ އާބާދީ ފާއިތުވި އަހަރާ އަޅާބަލާއިރު 1.6 އިންސައްތަ އިތުރުވެ، އެ ގައުމުގެ އާބާދީ 6.21 މިލިއަނަށް އަރައި އާ ރެކޯޑެއް ގާއިމުވެއްޖެއެވެ.
ސަރުކާރުން އާންމުކުރި ތަފާސްހިސާބުތަކުން ދައްކާގޮތުގައި، މި އިތުރުވުމުގެ މައިގަނޑު ސަބަބަކީ އެ ގައުމުގައި ދިރިއުޅޭ ބޭރު ގައުމުތަކުގެ ރައްޔިތުންގެ އާބާދީއަށް އައި ކުރިއެރުމެވެ.
މި އަހަރުގެ ޖޫން މަހުގެ ނިޔަލަށް އާންމުކުރި ހިސާބުތަކަށް ބަލާއިރު، ސިންގަޕޫރުގައި ދިރިއުޅޭ ބޭރުގެ ރައްޔިތުންގެ އާބާދީ ވަނީ 3.7 އިންސައްތަ އިތުރުވެ، ޖުމްލަ 1.98 މިލިއަނަށް އަރާފައެވެ. މި އިތުރުވުން މައިގަނޑު ގޮތެއްގައި ގުޅިފައިވަނީ އިމާރާތްކުރުމާއި އުމްރާނީ ތަރައްގީގެ ބޮޑެތި މަޝްރޫއުތަކަށް ބޭނުންވާ ބޭރުގެ މަސައްކަތްތެރިން އިތުރުވުމާއެކުގައެވެ.
ކޯވިޑް-19 ގެ އާލަމީ ވަބާއަށްފަހު އަޅާފައިވާ ވަރުގަދަ ފިޔަވަޅުތައް އުވާލި ފަހުން ސިންގަޕޫރުގެ އާބާދީއަށް ދަނީ ކުރިއެރުން އަންނަމުންނެވެ. ނަމަވެސް ބިން ކުޑަ ސިންގަޕޫރުގައި ބޭރުގެ މަސައްކަތްތެރިން އިތުރުވުމަކީ ސިޔާސީ ގޮތުން ނާޒުކު މައްސަލައެކެވެ. ސަބަބަކީ ވަޒީފާގެ ފުރުސަތުތަކާއި ދިރިއުޅުމުގެ ހަރަދުތަކާ މެދު އާންމު ރައްޔިތުންގެ ކަންބޮޑުވުންތަކެއް ހުރުމެވެ.
އާބާދީ އިތުރުވި ނަމަވެސް، 2026 ވަނަ އަހަރުގެ ދެވަނަ ކުއާޓަރުގައި ސިންގަޕޫރުގެ ވަޒީފާނެތް މީހުންގެ ނިސްބަތް ވަނީ 1.9 އިންސައްތައިގައި ދަށްކޮށް ހިފެހެއްޓިފައެވެ. މީގެ އިތުރުން، އިގްތިސާދީ ކުރިއެރުން ރަނގަޅުވުމާއެކު، ސިންގަޕޫރުގެ ސަރުކާރުން ވަނީ މިއަހަރުގެ އިގްތިސާދީ ކުރިއެރުމުގެ އަންދާޒާ 4.5 އިންސައްތައާއި 5.5 އިންސައްތައާ ދެމެދުގެ މިންވަރަކަށް މަތިކޮށްފައެވެ.
ސިންގަޕޫރަށް ކުރިމަތިވެފައިވާ އާބާދީ މުސްކުޅިވުމާއި ވިހާ މިންވަރު ދަށްވުމުގެ ގޮންޖެހުންތަކަށް ހައްލެއް ހޯދުމުގެ ގޮތުން، ކުރިއަށް އޮތް ފަސް އަހަރު ތެރޭގައި ކޮންމެ އަހަރަކު 30،000 އާ ހަމައަށް މީހުންނަށް ރައްޔިތުކަން ދިނުމަށް އެ ގައުމުން ވަނީ އަމާޒުހިފާފައެވެ. ތަފާސްހިސާބުތައް ދައްކާގޮތުން، އުމުރުން 65 އަހަރުން މަތީގެ މީހުންގެ ނިސްބަތް މިހާރު ވަނީ 19.5 އިންސައްތައަށް އަރާފައެވެ.
