މާލޭގެ ބޮޑުތަކުރުފާނު މަގުގައި ނުރައްކާތެރި ގޮތަކަށް ސައިކަލު ދުއްވި މީހާ ދެނެގަނެވިފައިވާ ކަމަށާއި، އޭނާ ހޯދުމުގެ މަސައްކަތް ކުރަމުން އަންނަ ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
މީސްމީޑިއާގައި މިހާރު ދައުރުވަމުންދާ ވީޑިއޯއިން ފެންނަ ގޮތުގައި، ބޮޑުތަކުރުފާނު މަގުން ބާރު ސްޕީޑުގައި ދުއްވާފައި ދިޔަ ސައިކަލެއް، އެއްވެސް ސިގްނަލެއް ދިނުމަކާ ނުލައި ކުއްލިއަކަށް މަޖީދީމަގަށް ލަނބާލައެވެ. އަދި އެ ވަގުތު މަގު ބަދަލުކުރުމުގެ ތެރޭގައި ސައިކަލު ނުރައްކާތެރި މިންވަރަކަށް އަރިކޮށްލާ މަންޒަރުވެސް އެ ވީޑިއޯއިން ސާފުކޮށް ފެނެއެވެ.
މިކަމާ ގުޅިގެން ފުލުހުން ބުނީ، ވީޑިއޯއިން ފެންނަ ސައިކަލު ދުއްވި ފަރާތަކީ ކާކުކަން މިހާރު ކަށަވަރު ކުރެވިފައިވާ ކަމަށެވެ. އަދި އެ މީހާ ހޯދައި، ގާނޫނީ ފިޔަވަޅު އެޅުމަށްޓަކައި އަޅަންޖެހޭ ފިޔަވަޅުތައް އަޅަމުންދާ ކަމަށްވެސް ވިދާޅުވިއެވެ.
ފަހަކަށް އައިސް މާލެ ސަރަޙައްދުގެ މަގުތަކުގައި ނުރައްކާތެރިކޮށް ވެހިކަލް ދުއްވާ މައްސަލަތައް އިތުރުވެ، އެކަމުގެ ކަންބޮޑުވުން އާންމުންގެ މެދުގައި ވަނީ ވަރަށް ބޮޑުވެފައެވެ. އެގޮތުން، ލައިސަންސް ނެތި ދުއްވި ސައިކަލަކުން ޖެހި، މިދިޔަ އާދީއްތަ ދުވަހުގެ ދަންވަރު ސޯސަންމަގުގައި ހިނގި ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއް ލިބުނު ޒުވާން އަންހެނަކަށް، އައިޖީއެމްއެޗްގެ ވެންޓިލޭޓަރުގައި ފަރުވާދެމުން ދަނިކޮށް އިއްޔެ ވަނީ ނިޔާވެފައެވެ.
