ރާއްޖޭގެ އެކި ރަށްރަށުގައި ހުއްޓިފައިވާ ބިން ހިއްކުމުގެ ބޮޑެތި މަޝްރޫޢުތައް ހަލުވިކަމާއެކު ކުރިއަށްގެންދިއުމަށްޓަކައި، އެމްޓީސީސީގައި މިހާރު ބޭނުންކުރާ ”މަހާޖައްރާފު“ އަށްވުރެ ތިންގުނަ ބޮޑު އާ ހޮޕާ ޑްރެޖަރެއް މިއަހަރުގެ ތެރޭގައި ރާއްޖެއަށް ގެނައުމަށް ސަރުކާރުން ވަނީ ނިންމައިފައެވެ.
ޕީއެސްއެމްގެ ”ނޭޝަންސް ޗެޓް“ ޕޮޑްކާސްޓުގައި މައުލޫމާތު ހިއްސާކުރައްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ކޮންޓްރެކްޓް ކުރެވިގެން މަސައްކަތް ނުފެށި ހުރި ބިން ހިއްކުމުގެ މަޝްރޫޢުތައް ކުރިއަށްގެންދިއުމަށް އިތުރު ޑްރެޖަރެއް ސެކިއުރ ކުރެވިފައިވާ ކަމަށެވެ. އަދި މިއަހަރު ނިމުމުގެ ކުރިން އެ ޑްރެޖަރު ގެނެވުމާއެކު، މަޑުޖެހިފައިވާ ގިނަ މަޝްރޫޢުތަކެއްގެ އަމަލީ މަސައްކަތް އެކީގައި ފެށިގެންދާނެ ކަމަށް އެމަނިކުފާނު ފާހަގަކުރެއްވިއެވެ.
ޤައުމީ ތަރައްޤީގެ މަސައްކަތްތަކަށް މަޑުޖެހުމެއް އައީ މެދުއިރުމަތީގައި ފެށުނު ހަނގުރާމައާ ގުޅިގެން މުޅި ދުނިޔެއަށް ކުރިމަތިވި މާލީ ތާށިކަމުގެ ސަބަބުން ކަމަށް ރައީސް ވިދާޅުވިއެވެ. ނަމަވެސް، ދައުލަތުގެ ހަރަދުތައް އަލުން ތަރުތީބުކޮށްގެން އެޅި ފިޔަވަޅުތަކާއެކު، އެ ދަތިތަކުން އަރައިގަނެވި މަޝްރޫޢުތައް އަލުން ހިންގާލެވޭނެ މަގު މިހާރު ފަހިވެފައިވާ ކަމަށް އެމަނިކުފާނު ވިދާޅުވިއެވެ.
ސަރުކާރުގެ އެންމެ ގިނަ ތަރައްޤީގެ މަޝްރޫޢުތައް ހިންގާ އެމްޓީސީސީގެ ހިންގުން ހަރުދަނާކޮށް، އެ ކުންފުންޏަށް ބޭރު ފައިސާ ލިބޭނެ އިންތިޒާމުތައް ހަމަޖައްސަވަމުންދާކަން ފާހަގަކުރައްވަމުން ރައީސް ވިދާޅުވީ، މަޝްރޫޢުތަކަށް ބޭނުންވާ ބޮޑުހިލައާއި އެހެނިހެން ވަސީލަތްތައް ކުރިއަށް އޮތް ތަނުގައި ލަސްތަކެއް ނުވެ ލިބެން ފަށާނެ ކަމަށެވެ.
ރައީސް މުޢިއްޒު ވިދާޅވި ގޮތުގައި، ސަރުކާރުގެ އަމާޒަކީ އެމްޓީސީސީއަކީ ހަމައެކަނި ދައުލަތުގެ މަޝްރޫޢުތަކަށް ބަރޯސާވާ ކުންފުންޏަކަށް ނުހަދައި، އަމިއްލަ ބޮޑެތި ވިޔަފާރިތަކުގެ މަސައްކަތްތައް ވެސް ނަގައިގެން އަމިއްލައަށް އާމްދަނީ ހޯދޭނެ ފެންވަރަށް އެ ކުންފުނީގެ ޤާބިލުކަން އިތުރުކޮށް ވަރުގަދަކުރުމެވެ.
މި ސަރުކާރު އައުމުގެ ކުރިން އެމްޓީސީސީން ބޭރުމީހުންގެ ޕްރޮޖެކްޓްތައްވެސް ރާއްޖޭގަ ކުރި. މިސަރުކާރަށް އަދި އެއްކަމެއް ކަމެއް ނުވޭ.