އެކުވެރި ދައުލަތްތަކުގެ ޖަމިއްޔާ (އދ) ގެ ހިންގުމުގެ ނިޒާމަށް ޒަމާނީ ބޮޑެތި އިސްލާހުތަކެއް ގެނެސް، ސަލާމަތީ މަޖިލީހުގެ މެންބަރު ގައުމުތަކަށް ލިބިފައިވާ ވީޓޯ ކުރުމުގެ ބާރު އުވާލުމަށް ނައިބު ރައީސް ހުސެއިން މުހައްމަދު ލަތީފު ގޮވާލައްވައިފިއެވެ.
އެމަނިކުފާނު މިކަމަށް ގޮވާލެއްވީ އެމެރިކާގެ ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ ބައްދަލުވުމުގައި ރާއްޖޭގެ ފަރާތުން ތަގުރީރު ކުރައްވަމުންނެވެ.
ނައިބު ރައީސްގެ ތަގުރީރުގައި ވިދާޅުވީ، ދުނިޔޭގެ ސުލްހައާއި އަމާންކަން ދެމެހެއްޓުމަށްޓަކައި އދ. އަށް އޮތް އިތުބާރު އަލުން އިއާދަކުރަންޖެހޭ ކަމަށެވެ. އަދި ސަލާމަތީ މަޖިލީހަކީ މިއަދުގެ ދުނިޔެއަށް ގޮތް ނިންމާއިރު 1945 ވަނަ އަހަރުގެ ދުނިޔެ ސިފަކޮށްދޭ ތަނަކަށް ވެގެންނުވާނެ ކަމަށާއި، އެ މަޖިލީހުގެ ދާއިމީ އަދި ދާއިމީ ނޫން ގޮނޑިތަކުގެ އަދަދު އިތުރުކުރަންޖެހޭ ކަމަށް ފާހަގަކުރެއްވިއެވެ.
ޚާއްސަކޮށް ތަރައްގީވަމުންދާ ކުދި ޖަޒީރާ ގައުމުތަކަށް ސަލާމަތީ މަޖިލީހުން ދައުރުވާ ގޮތަށް ދާއިމީ ނޫން ގޮނޑިއެއް ކަނޑައެޅުމަކީ މަޖުބޫރު ކަމެއް ކަމަށް ނައިބު ރައީސް ވިދާޅުވިއެވެ. މީގެ އިތުރުން އެފްރިކާ ބައްރަށް އެތައް ދުވަހަކު ނުލިބި އޮތް ހަމަހަމަ ތަމްސީލުކުރުމުގެ ފުރުސަތު މިހާރުން މިހާރަށް ފަހިކޮށްދޭންޖެހޭ ކަމަށްވެސް އެމަނިކުފާނު ފާހަގަކުރެއްވިއެވެ.
ކުދި ގައުމުތަކަށް މޫސުމީ ބަދަލުތަކާއި، މާލީ ދަތިތަކާއި، ސަޕްލައި ޗެއިންތަކުގެ އިތުރުން ސަލާމަތީ ކަންކަން ގުޅިލާމެހިފައިވާ މިންވަރު އެނގޭކަން ފާހަގަކުރައްވައި ނައިބު ރައީސް ވިދާޅުވީ، ބާރުގަދަ ގައުމުތަކުގެ ކުރިމަތީގައި ކުދި ގައުމުތަކަށް އޮތް އެންމެ ވަރުގަދަ އައްޑަނައަކީ ބައިނަލްއަގުވާމީ ގާނޫނުތައް ކަމަށެވެ. އަދި ސިޔާސީ ނުފޫޒާއި ގައުމެއްގެ ބާރަކީ ޒިންމާދާރުކުރުވުމުން ރެކެން އޮތް ސަބަބަކަށް ވެގެންނުވާނެ ކަމަށްވެސް ވިދާޅުވިއެވެ.
ރާއްޖެއިން އދ. ގެ ތަފާތު ގުނަވަންތަކުގެ ގޮނޑިތަކަށް ކުރިމަތިލާން ނިންމާފައިވާކަން ހާމަކުރައްވަމުން، ނައިބު ރައީސް ވިދާޅުވީ އެއީ ކުދި ގައުމުތަކަކީ ހަމައެކަނި އެހެން ބަޔަކު ނިންމާ ނިންމުންތަކަށް ތަބާވާ ބައެއްގެ ބަދަލުގައި، އަމިއްލައަށް ނިންމުންތައް ނިންމާ މޭޒުދޮށުގައި ތިބޭ ބަޔަކަށް ހެދުމުގެ މަގުސަދުގައި ކަމަށެވެ.
ތަގުރީރު ނިންމަވާލައްވަމުން ނައިބު ރައީސް ވިދާޅުވީ އދ. އަށް ގެންނަ އިސްލާހީ ބަދަލުތަކަކީ ހަމައެކަނި ލިޔެކިޔުމުގައި އޮންނަ ބަދަލުތަކަކަށް ނުވެ، އަމަލީ ގޮތުން ނަތީޖާ ނެރެދޭ ބަދަލުތަކަކަށް ވާންޖެހޭނެ ކަމަށެވެ. އަދި އެ ޖަމިއްޔާގެ ތާރީޚުގައި ގެނެވޭނެ އެންމެ މުހިންމު އެއް ބަދަލުގެ ގޮތުގައި، ޖެނެރަލް ސެކްރެޓަރީގެ މަގާމަށް އަންހެނަކު އިންތިޚާބުކުރުމަށް ރާއްޖެއިން ތާއީދުކުރާކަންވެސް އެމަނިކުފާނު ހާމަކުރެއްވިއެވެ.
