އައްޑޫ ސިޓީގެ ގުޅިފައިވާ ރަށްތަކުގެ ދަތުރުފަތުރަށް ބޮޑެތި ގޮންޖެހުންތަކެއް ދިމާވެފައިވާ ލިންކް ރޯޑް މަރާމާތުކޮށް ހަތަރު ލޭނަށް ފުޅާކުރުމުގެ މަޝްރޫޢު ޗައިނާގެ ރޯޓައިމް އިންޖިނިއަރިންގ އެންޑް ޓެކްނޮލޮޖީ ކޯ ލިމިޓެޑާ މިއަދު ހަވާލުކޮށްފިއެވެ.
މި މަޝްރޫޢުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިންފްރާސްޓްރަކްޗާ މިނިސްޓަރު ޢަބްދުﷲ މުއްތަލިބެވެ. އަދި ރޯޓައިމް ކުންފުނީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޒޫ ވެއިޑޮންގްއެވެ.
މި އެއްބަސްވުމުގެ ދަށުން އައްޑޫ ޑީޓުއާ ބްރިޖުން ފެށިގެން ހިތަދޫ ސްޓޭޑިއަމްއާ ހަމައަށް އޮތް 12.3 ކިލޯމީޓަރުގެ މަގު، މިހާރު އޮތް ދެ ލޭނުން ހަތަރު ލޭނަށް ފުޅާކޮށް، އެކީ އަލުން ތަރައްޤީކުރުމަށް ވަނީ ހަމަޖެހިފައެވެ. މި މަޝްރޫޢުގެ ސަބަބުން ހިތަދޫ، މަރަދޫ، މަރަދޫފޭދޫ، ފޭދޫ އަދި ގަން އެއްގަމު މަގުން ގުޅުވައިދޭ މައި ދާރާއަށް ބޮޑު އެދެވޭ ބަދަލެއް އަންނާނެއެވެ.
އައްޑޫގެ ގިނަ ރައްޔިތުންގެ އާންމު ދިރިއުޅުމާއި އިޤްތިޞާދީ ހަރަކާތްތަކާ ސީދާ ގުޅިފައިވާ މި މަގުގައި ބޮޑެތި ވަޅުގަނޑުތައް ހެދި، އުޅަނދުފަހަރަށާއި ދަތުރުވެރިންނަށް ބޮޑެތި ގެއްލުންތަކެއް ދަނީ ލިބެމުންނެވެ. އަދި އެކި ފަހަރު މަތިން މަގު މަރާމާތުކުރަން ނިންމި ނަމަވެސް ދާއިމީ ހައްލެއް ލިބިފައިނުވާއިރު، މި ދުވަސްވަރު ކުރި ވިއްސާރައިގައި ފެންބޮޑުވެ މަގުގެ ހާލަތު އިތުރަށް ގޯސްވުމުން، ކޮންމެހެން ދާންޖެހިގެން ނޫނީ އެ މަގު ބޭނުންނުކުރުމަށް އައްޑޫ ސިޓީ ކައުންސިލުންވެސް ވަނީ އިލްތިމާސްކޮށްފައެވެ.
މި މަސައްކަތް ހަވާލުކުރި ޗައިނާގެ ރޯޓައިމް އިންޖިނިއަރިންގއަކީ ރާއްޖޭގައި އުމްރާނީ ތަރައްޤީގެ އެކި މަޝްރޫޢުތައް ކުރިންވެސް ހިންގާފައިވާ ކުންފުންޏެކެވެ. އެގޮތުން ވޭތުވެދިޔަ އަހަރުގެ ޑިސެމްބަރު މާސްތެރޭގައި ހުޅުމާލޭގެ މަގުތައް ހެދުމުގެ ބޮޑު މަޝްރޫޢެއްވެސް ސަރުކާރުން ވަނީ އެ ކުންފުންޏާ ހަވާލުކޮށްފައެވެ.
