އިތިއޯޕިއާގެ އުތުރުގައި އޮންނަ ޓިގްރޭ ސަރަޙައްދުގެ ވެރިރަށް، މެކެލޭގައި ހުންނަ ’އަލޫލާ އަބާ ނެގާ‘ އެއަރޕޯޓް، އެ ސަރަޙައްދުގެ ހަނގުރާމަވެރި ޖަމާޢަތް ކަމަށްވާ ޓިގްރޭ ޕީޕަލްސް ލިބަރޭޝަން ފްރޮންޓް (ޓީޕީއެލްއެފް) ގެ ކޮންޓްރޯލްގެ ދަށަށް ގެންގޮސްފިއެވެ.
ބުދަ ދުވަހުގެ ހެނދުނު ހިންގި މި ޢަމަލާ ގުޅިގެން އިތިއޯޕިއަން އެއަރލައިންސް އިން ވަނީ ޓިގްރޭ ސަރަޙައްދަށް ކުރާ ހުރިހާ ދަތުރުތަކެއް މެދުކަނޑާލާފައެވެ. މިއީ 2025 ވަނަ އަހަރުގެ ފަހުކޮޅު ސުލްޙައިގެ އެއްބަސްވުން އުވި، އަލުން ހަނގުރާމަ ފެށުނުފަހުން އެ ސަރަޙައްދުގެ މަސްރަޙު މިހާ ބޮޑަށް ގޯސްވި ފުރަތަމަ ފަހަރެވެ.
އޭއެފްޕީއަށް މަޢުލޫމާތު ދިން އެއަރޕޯޓުގެ މުވައްޒަފަކު ބުނިގޮތުގައި، ހެނދުނު ވަޒީފާއަށް ދިޔަ މަގުމަތީގައި ވެރިން ވަނީ ގުޅައި، އެއަރޕޯޓް ހަނގުރާމަވެރިންގެ ބާރުގެ ދަށަށް ގޮސްފައިވާތީ އެނބުރި ގެއަށް ދިއުމަށް އަންގާފައެވެ. މިކަމާ ގުޅިގެން ޤައުމީ އެއަރލައިނުން ވަނީ މެކެލޭ، އަކްސުމް އަދި ޝިރޭއަށް ކުރާ ހުރިހާ ދަތުރުތަކެއް ވަގުތުން ހުއްޓާލާފައެވެ.
މި ހަމަލާދީފައިމިވަނީ، އިތިއޯޕިއާގެ ބޮޑުވަޒީރު އަބީ އަޙްމަދުގެ ސަރުކާރު ވައްޓާލުމަށްޓަކައި އެ ޤައުމުގެ އެކި ސަރަޙައްދުތަކުގައި ޙަރަކާތްތެރިވާ 7 ހަތިޔާރުއެޅި ޖަމާޢަތަކުން ގުޅިގެން އައު އިއްތިޙާދެއް އުފެއްދިތާ 3 ދުވަސް ފަހުންނެވެ. ޓީޕީއެލްއެފް އިންވެސް ވަނީ މި އިއްތިޙާދުގައި ބައިވެރިވެފައެވެ.
މިކަމުގެ ރައްދުގައި ސަރުކާރު ސިފައިން ދަނީ ޓިގްރޭ ބޯޑަރު ކައިރިއަށް ޖަމާވަމުންނެވެ. އަދި ސަރުކާރުން އަންނަނީ ހަނގުރާމަވެރިންގެ އަމާޒުތަކަށް ޑްރޯން ޙަމަލާތައްވެސް ދެމުންނެވެ. މިކަމުގެ ސަބަބުން، ކުރީގެ ހަނގުރާމައިގައި ހާލުގައި ޖެހިފައިވާ މިލިއަނަކަށްވުރެ ގިނަ ރައްޔިތުންގެ ފުރާނައަށް ވަނީ ބޮޑު ނުރައްކަލަކާ ކުރިމަތިވެފައެވެ.
