ހުޅުމާލޭގައި ސަރުކާރުގެ ހަރަދުގައި ތަރައްގީކުރުމަށް ހަމަޖެހިފައިވާ 50 އެނދުގެ ނަފުސާނީ ބަލީގެ ހާއްސަ ހޮސްޕިޓަލް އިމާރާތްކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން މިއަދު ބީލަމަށް ހުޅުވާލައިފިއެވެ.
ފިނޭންސް މިނިސްޓްރީން ޝާއިއުކުރި އިއުލާނެއްގައިވާ ގޮތުން، ހައުސިންގ މިނިސްޓްރީގެ އެދުމުގެ މަތިން ކުރިއަށްގެންދާ މި މަޝްރޫއުގެ ބީލަމުގައި ބައިވެރިވުމުގެ ފުރުސަތު މިހާރު ވަނީ ހުޅުވާލެވިފައެވެ. ބީލަމުގައި ބައިވެރިވުމަށްޓަކައި 1،500 ރުފިޔާގެ ރަޖިސްޓްރޭޝަން ފީއެއް ދައްކަންޖެހޭއިރު، ’ބަނޑޭރިޕޭ‘ ޕޯޓަލް މެދުވެރިކޮށް އަންނަ އޮކްޓޫބަރު މަހުގެ 20 ވަނަ ދުވަހުގެ ނިޔަލަށް ފައިސާ ދެއްކުމުގެ އިންތިޒާމު ވަނީ ހަމަޖައްސައިފައެވެ.
މި މަޝްރޫއުގެ ބިޑް ސެކިއުރިޓީގެ ގޮތުގައި 864،000 ދިވެހި ރުފިޔާ ކަނޑައަޅާފައިވާއިރު، ބިޑް ސެކިއުރިޓީގެ މުއްދަތަކީ ބީލަން ހުޅުވާ ތާރީހުން ފެށިގެން 148 ދުވަހެވެ. އަދި ބީލަން ހުށަހެޅުމާއި ބީލަން ހުޅުވުން އޮންނާނީ އަންނަ އޮކްޓޫބަރު މަހުގެ 25 ވާ ބުރާސްފަތި ދުވަހުގެ މެންދުރުފަހު 13:00 ގައެވެ.
މި ހޮސްޕިޓަލް ތަރައްގީކުރުމަށް ބޭރުގެ ލޯނު ހޯދުމުގެ މަރުހަލާ ދިގުލައިގެން ދިއުމާ ގުޅިގެން، ދައުލަތުގެ ބަޖެޓުން ހަރަދުކޮށްގެން މަޝްރޫއު ކުރިއަށްގެންދިއުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނުކުރެއްވީ މިއަހަރުގެ އެޕްރީލް 27 ގައި ބޭއްވެވި ނޫސްވެރިންގެ ބައްދަލުވުމުގައެވެ. މި ހޮސްޕިޓަލް އެންމެ ފުރަތަމަ އެޅުމަށް ރޭވިފައި އޮތީ ލ. ގަމުގައެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، މި މަޝްރޫއަށް ކުރިން ހޯދުމަށް މަސައްކަތްކުރި ބޭރުގެ ލޯނު ފެސިލިޓީ، ސިއްހީ ދާއިރާގެ އެހެނިހެން މުހިންމު ކަންކަމަށް ބޭނުންކުރުމަށް ސަރުކާރުން މަސައްކަތްކުރައްވަމުން ގެންދަވާ ކަމަށެވެ.
