ސަޢޫދީ ޢަރަބިއްޔާއާ މެދު ދިވެހިރާއްޖެއިން އަބަދުވެސް ގެންގުޅޭ އަހުވަންތަ އަދި އިހުލާސްތެރި ހާރިޖީ ސިޔާސަތު، އެ ގައުމުގެ ރަސްކަމުން ޝުކުރުވެރިކަމާއެކު އަގުވަޒަންކުރާ ކަމަށް ރާއްޖޭގައި ހުންނަވާ ސަޢޫދީ ސަފީރު ޔަޙްޔާ ޙަސަން އަލްޤަޙްޠާނީ ވިދާޅުވެއްޖެއެވެ.
ސަޢޫދީ ޢަރަބިއްޔާގެ 96 ވަނަ ޤައުމީ ދުވަހުގެ މުނާސަބަތުގައި ނެރުއްވި ބަޔާނެއްގައި ސަފީރު ފާހަގަކުރެއްވި ގޮތުގައި، ދެ ޤައުމުގެ ދެމެދުގައި އޮތީ އިސްލާމީ އުހުއްވަތްތެރިކަމާއި، ޒަމާންވީ ރަހުމަތްތެރިކަމުގެ އިތުރުން އެއް ގައުމުން އަނެއް ގައުމަށް ކުރާ އިހުތިރާމުގެ މައްޗަށް ބިނާވެފައިވާ ވަރުގަދަ ގުޅުމެކެވެ. އަދި ސިޔާސީ، ތައުލީމީ، އިސްލާމީ އަދި ތަރައްގީގެ ދާއިރާތަކުން ދެ ގައުމުން ދެމުން އަންނަ އެއްބާރުލުމުގެ ސަބަބުން މި ގުޅުން އިތުރަށް ބަދަހިވަމުން އަންނަކަން އޭނާ ފާހަގަކުރެއްވިއެވެ.
”ސަޢޫދީ ޢަރަބިއްޔާއާ މެދު ދިވެހިރާއްޖެއިން އަބަދުވެސް ދަމަހައްޓަމުން އަންނަ އިހުލާސްތެރި، އަހުވަންތަ ސިޔާސަތު ސަޢޫދީ ރަސްކަމުން ބަލައިގަންނަނީ ނުހަނު ޝުކުރުވެރިކަމާއެކު. އެ ސިޔާސަތުތަކުން ހާމަވަނީ ދެ ގައުމުގެ ދެމެދުގައިވާ އެއްބައިވަންތަކަމާއި، މިއޮތް ބަދަހި ރަހުމަތްތެރިކަން،“ – ސަފީރުގެ ބަޔާނުގައި ވިދާޅުވެފައިވެއެވެ.
ދެ ޤައުމުގެ ގުޅުމުގެ މައި ތަނބަކީ ތަރައްގީގެ މައިދާނުގައި ދެވޭ އެއްބާރުލުންކަން ފާހަގަކުރައްވަމުން ސަފީރު ވިދާޅުވީ، ރާއްޖޭގެ މުހިންމު ތަރައްގީގެ މަޝްރޫއުތަކަށް އެހީތެރިވުމުގެ ގޮތުން 1978 ވަނަ އަހަރުން ފެށިގެން މިހާތަނަށް ’ސައޫދީ ފަންޑް ފޯ ޑިވެލޮޕްމަންޓް‘ މެދުވެރިކޮށް 488 މިލިއަން ޑޮލަރު ހަރަދުކޮށްފައިވާ ކަމަށެވެ.
ސައޫދީ ޢަރަބިއްޔާގެ ގައުމީ ދުވަހުގެ ގޮތުގައި ފާހަގަކުރަނީ، ހިޖާޒާއި ނަޖުދު އެއްބައިވަންތަކޮށް، ”ކިންގްޑަމް އޮފް ނަޖުދު އެންޑް ހިޖާޒް“ ގެ ނަން ”ސައޫދީ ޢަރަބިއްޔާ“ ގެ ނަމަށް ބަދަލުކުރި ތާރީހީ ދުވަހެވެ. މިއީ އާލް ސުޢޫދު ދަރިކޮޅުގެ ފުރަތަމަ ރަސްގެފާނު ޢަބްދުލްޢަޒީޒް ބިން ސަޢޫދު ނެރުއްވި ގަރާރަކުން، 23 ސެޕްޓެމްބަރު 1932 ގައި ގެންނެވި ބަދަލެކެވެ.
