މިދިޔަ ހަފްތާގައި މާލެ ސަރަހައްދުން އިތުރު 13 މީހަކު ހިމަބިހި ނުވަތަ މީސަލްސްއަށް ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭގެ އެންމެފަހުގެ ތަފާސްހިސާބުތައް ދައްކާގޮތުން، މިދިޔަ ހަފްތާ ނޫން އޭގެ ކުރީ ހަފްތާގައި މި ބައްޔަށް ޕޮޒިޓިވްވެފައިވަނީ އެންމެ ފަސް މީހުންނެވެ. ނަމަވެސް، މިދިޔަ ހަފްތާގައި އަލަށް ފެނުނު 13 ކޭހާއެކު، މި އަހަރުގެ މިހާތަނަށް ރާއްޖެއިން ހިމަބިއްސަށް ޕޮޒިޓިވްވި މީހުންގެ ޖުމްލަ އަދަދު މިހާރު ވަނީ 282 އަށް އަރައިފައެވެ. ބަލި ފެތުރުން ކޮންޓްރޯލް ކުރުމަށްޓަކައި މިހާތަނަށް 16،423 މީހަކަށް ހިމަބިހީގެ ވެކްސިން ވަނީ ދީފައެވެ.
އެޗްޕީއޭއިން ވަނީ އެމްއެމްއާރު ވެކްސިންގެ ދެ ޑޯޒް ފުރިހަމަކުރިކަން ޔަގީންނުވާ ފަރާތްތަކުން ވީ އެންމެ އަވަހަކަށް ވެކްސިން ފުރިހަމަކުރުމަށް އިލްތިމާސްކޮށްފައެވެ. އަދި ބަލިޖެހިފައިވާ މީހަކާ ސީދާ ދިމާވެފައިވާ ފަރާތްތަކަށް، ހުޅުމާލެ ހޮސްޕިޓަލާއި މާލޭގެ އަރބަން ޕްރައިމަރީ ހެލްތު ކެއާ ސެންޓަރުން ވެކްސިން ދިނުމުގައި ހާއްސަ އިސްކަމެއް ދެވޭނެ ކަމަށްވެސް އެ އެޖެންސީން ބުނެއެވެ.
ހިމަބިހިން ރައްކާތެރިވުމަށްޓަކައި އެޗްޕީއޭއިން އާންމުންނަށް ދީފައިވާ މުހިންމު އިރުޝާދުތަކުގެ ތެރޭގައި ހިމެނެނީ:
- ހުން އައުމާއެކު ހަމުގައި ރަތް ބިހިތަކެއް ނަގާނަމަ ލަސްނުކޮށް ޑޮކްޓަރަށް ދެއްކުން.
- ސިއްހީ ހިދުމަތް ހޯދުމަށް ދާއިރު މާސްކު އެޅުން.
- ބައްޔަށް ޝައްކުކުރެވިގެން ޓެސްޓު ހަދާފައިވާނަމަ، ނަތީޖާ ލިބެންދެން ގޭގައި އެކަހެރިވެ ތިބުން.
- ބަލީގެ އެއްވެސް އަލާމާތެއް ހުރިނަމަ މީހުން އެއްވެ އުޅޭ ތަންތަނަށް ނުދިއުން.
މި ބައްޔަކީ ވައިގެ ޒަރީއާއިން ވަރަށް ހަލުވިކަމާއެކު ފެތުރޭ ބައްޔެކެވެ. އެހެންކަމުން، ވެކްސިން ނުޖަހާ މީހުން މުޖުތަމައުގައި ގިނަވާނަމަ، ރާއްޖެއިން ބޭރުން އަންނަ މީހުންގެ ފަރާތުން މި ބަލި އަލުން ފެތުރުމުގެ ބޮޑު ފުރުސަތެއް އޮވެއެވެ. މިހާރު ކުރިއަށްދާ ވެކްސިން ދިނުމުގެ ކެމްޕޭނުގެ މައިގަނޑު މަގުސަދަކީ މި ބަލި އަލުން ރާއްޖޭގައި ފެތުރި، ވަޒަންވެރިވިޔަ ނުދީ ހުއްޓުވުމެވެ.
