ޕާކިސްތާނުގެ ގާނޫނު ހަދާ މަޖިލީހުން ދެއްވި ޚާއްސަ ދައުވަތަކަށް، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގެ އަރިހުގައި ވެރިކަން ކުރާ ޕީއެންސީގެ 16 މެންބަރުންގެ މައްޗަށް އެކުލެވޭ މަތީ ފަންތީގެ ޕާލިމަންޓްރީ ވަފުދެއް މިއަދު އެ ގައުމަށް ރަސްމީ ދަތުރުފުޅެއްގައި ފުރާވަޑައިގެންފި އެވެ.
މި ދަތުރުފުޅުގައި ވަފުދުގެ އެންމެ އިސް ބޭފުޅެއްގެ ގޮތުން ވަޑައިގަންނަވަނީ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އެވެ. އޭގެ އިތުރުން ޕާޓީގެ ޕާލިމަންޓްރީ ގުރޫޕުގެ ނައިބު ލީޑަރުންނާއި، ޕާޓީގެ ނައިބު ރައީސްގެ މަގާމުގައި ހުންނެވި ބާރަށު ދާއިރާގެ މެންބަރު އިބްރާހީމް ޝުޖާއު ވެސް މި ދަތުރުފުޅުގައި ބައިވެރިވެވަޑައިގަންނަވަ އެވެ.
ޕާކިސްތާނަށް ކުރައްވާ މި ދަތުރުފުޅުގެ މައިގަނޑު މަގުސަދަކީ އެ ގައުމުގެ ގާނޫނު ހަދާ މަޖިލީހަށް ޒިޔާރަތުކޮށް، ދެ ގައުމުގެ މަޖިލީހުގެ މެންބަރުންގެ މެދުގައި ގުޅުން ބަދަހިކުރުމާއި ތަޖުރިބާއާއި ހިޔާލު ބަދަލުކުރުން ކަމަށް ޕީއެންސީން ވަނީ ހާމަކޮށްފަ އެވެ.
