އަމީނީ މަގު އަލުން މަރާމާތުކޮށް ރަނގަޅު ފެންވަރަކަށް ތަރައްގީކުރުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، ފުރަތަމަ ސެގްމަންޓުގައި ތާރު އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކާމިޔާބުކަމާއެކު ނިންމާލައިފިއެވެ.
އެމްޓީސީސީން މި ސެގްމަންޓުގައި ތާރު އެޅުމުގެ މަސައްކަތް ފަށާފައިވަނީ މިދިޔަ ހޮނިހިރު ދުވަހުއެވެ. އެގޮތުން ދެ ފަށަލައަކަށް ބަހާލައިގެން ކުރިއަށް ގެންދިޔަ މި މަސައްކަތުގައި، ދެވަނަ ފަށަލަ އެޅުމުގެ މަސައްކަތް އިއްޔެ ފަށައި، މިއަދު ހެނދުނުގެ ވަގުތެއްގައި ވަނީ މުޅިން ނިންމާލައިފައެވެ. އަދި ތާރުއަޅައި ނިމުމާއެކު، މިހާރު ކުރިއަށްދަނީ މަގުމަތީގެ ނިޝާންތައް ކުރެހުން ފަދަ އެންމެ ފަހުގެ ފިނިޝިންގ މަސައްކަތްތައް ކަމަށް އެ ކުންފުނިން މައުލޫމާތުދެއެވެ.
މި މަޝްރޫއުގެ ދަށުން ފުރަތަމަ ސެގްމަންޓުގައި ހިމެނެނީ އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލް ކައިރީގައި އޮންނަ ޕާކާ ހަމައަށް އޮތް ސަރަހައްދެވެ. މި ސަރަހައްދުގެ މަސައްކަތްތައް ނިމުމުން، ދެން ފެށުމަށް ހަމަޖެހިފައިވަނީ ދެވަނަ ސެގްމަންޓް ކަމަށްވާ އިއްޒުއްދީން މަގުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށް އޮތް ސަރަހައްދުގައި ތާރުއެޅުމުގެ މަސައްކަތެވެ.
ޒަމާނީ ފެންވަރަކަށް މިދިޔަ ސަރުކާރުގައި ތަރައްގީކުރި އަމީނީ މަގުގެ އެ ސަރަހައްދު ހަލާކުވާން ދިމާވި މައިގަނޑު ސަބަބެއް ކަމަށް ފަންނީ މާހިރުން ވިދާޅުވަނީ، ތާރު އެޅުމަށްފަހު އެކަށީގެންވާ ވަރަށް ނުހިކެނީސް އާންމު ދަތުރު ފަތުރަށް މަގު ހުޅުވާލުމެވެ.
އަމީނީ މަގުގެ ހަލާކުވެފައިވާ ބައިތައް މަރާމާތުކޮށް އަލުން ތާރު އެޅުމުގެ މަސައްކަތް އެމްޓީސީސީއާ ހަވާލުކުރެވުނީ މިއަހަރުގެ ޖޫން މަހުގެ ތެރޭގައެވެ. މަގުގެ މަސައްކަތްތައް ބާރަށް ކުރިއަށްދާއިރު، ސަރުކާރުގެ އަމާޒަކީ ވީހާވެސް އަވަހަކަށް މުޅި މަގުގެ މަސައްކަތް ނިންމައި އާންމުންނަށް ހުޅުވާލުމެވެ.
