ޖަޕާނުގެ އައިޗީ-ނަގޯޔާގައި މިހާރު ކުރިއަށްދާ 20 ވަނަ އޭޝިއަން ގޭމްސްއަކީ ރާއްޖޭގެ އެންމެ ބާރު ދުވުންތެރިޔާ ޙަސަން ސާއިދުގެ ކުޅިވަރު ހަޔާތުގައި ވަރަށް ހާއްސަ މުބާރާތެކެވެ. މިއީ އޭޝިއާގެ އެންމެ ބޮޑު ކުޅިވަރު ހަރަކާތުގައި އޭނާ ފެނިގެންދާނެ ފަސްވަނަ ފަހަރެވެ.
އެތުލެޓިކްސް ފަދަ ވާދަވެރި މައިދާނެއްގައި، މެދުކެނޑުމެއްނެތި ފަސް އޭޝިއަން ގޭމްސްގައި ގައުމު ތަމްސީލުކުރުމުގެ ފުރުސަތު ލިބުމަކީ ތާރީހުން ވެސް މަދުން ނޫނީ ނުފެންނަ ވަރުގެ ބޮޑު ޝަރަފެކެވެ.
އުމުރުން 34 އަހަރުގެ ސާއިދުގެ އޭޝިއަން ގޭމްސްގެ ދަތުރު ފެށުނީ މީގެ 16 އަހަރު ކުރިންނެވެ. އެއީ އުމުރުން އެންމެ 18 އަހަރުގައި، 2010 ވަނަ އަހަރު ޗައިނާގެ ގުއަންޒޫގައި ބޭއްވި އޭޝިއަން ގޭމްސްއިންނެވެ. އޭގެ ފަހުން، 2014 ވަނަ އަހަރު ދެކުނު ކޮރެއާގެ އިންޗިއޮން، 2018 ވަނަ އަހަރު އިންޑޮނޭޝިއާގެ ޖަކާޓާ-ޕަލެމްބަންގް އަދި 2023 ވަނަ އަހަރު ޗައިނާގެ ހަންގްޒޫގައި ބޭއްވުނު އޭޝިއަން ގޭމްސްތަކުގައި ވެސް ސާއިދު ވަނީ ވާދަކޮށްފައެވެ.
މި ފަހަރުގެ އޭޝިއަން ގޭމްސްއަށް ފުރުމުގެ ކުރިން މީސްމީޑިއާގައި ހިއްސާކުރި މެސެޖެއްގައި ސާއިދު ބުނެފައިވަނީ، ވޭތުވެދިޔަ ދިގު މުއްދަތުގައި ފަސް އޭޝިއަން ގޭމްސްގައި ރާއްޖެ ތަމްސީލުކުރަން ލިބުމަކީ ފަހުރުވެރިވާ ކަމެއް ކަމަށެވެ. އަދި 2010 އިން ފެށިގެން މިހާތަނަށް ކޮންމެ މުބާރާތެއްގައި ވެސް ވާދަކުރެވުނީ ކުޅިވަރު ހަޔާތުގެ ތަފާތު މަރުހަލާތަކެއްގައި ކަމަށާއި، އެ ކޮންމެ މުބާރާތަކުން ވެސް އަގުނުކުރެވޭ ފަދަ ތަޖުރިބާތަކާއި މުހިންމު ފިލާވަޅުތަކެއް ހާސިލުކުރެވުނު ކަމަށް އޭނާ ފާހަގަކުރިއެވެ.
ރާއްޖެއަށް ބައިނަލްއަގުވާމީ ފެންވަރުގައި ރަން މެޑެލް ހޯދައިދީ، ރީތި ނަން ހޯދައިދީފައިވާ ސާއިދުގެ ކުޅިވަރު ހަޔާތުގެ މި މުހިންމު ހިސާބުން، މިއީ އޭނާ ފެނިގެންދާނެ އެންމެ ފަހު އޭޝިއަން ގޭމްސް ކަމަށް ބެލެވެއެވެ. ސަބަބަކީ، ގަތަރުގައި 2030 ވަނަ އަހަރު އޮންނަ އޭޝިއަން ގޭމްސް އަންނައިރު އޭނާގެ އުމުރުން 38 އަހަރު ވާނެތީއެވެ.
ފާހަގަކޮށްލަންޖެހޭ ގޮތުގައި މި އަހަރުގެ އޭޝިއަން ގޭމްސް މުބާރާތުގައި ސާއިދު ވާދަކުރުމަށް ހަމަޖެހިފައިވަނީ 100 މީޓަރު ދުވުމުގެ އިތުރުން ރިލޭ އިވެންޓުގައެވެ.
