ސަޢޫދީ ޢަރަބިއްޔާ އާއި ޔަމަނުގެ ހޫޘީންނާ ދެމެދު އަލުން ފެށިފައިވާ ހަނގުރާމައިގެ ތެރެއިން، 2022 ވަނަ އަހަރުގެ އެއްބަސްވުން އުވާލިފަހުން ފުރަތަމަ ފަހަރަށް ހޫޘީން ވަނީ ސައުދީގެ ވެރިރަށް ރިޔާޟަށް އަމާޒުކޮށް ވަރުގަދަ ޙަމަލާތަކެއް ދީފައެވެ.
ހޮނިހިރު ދުވަހުގެ ރޭގަނޑު ދަންވަރުގެ ވަގުތެއްގައި ހޫޘީން ފޮނުވާލި ބެލިސްޓިކް މިސައިލްތަކާއި ޑްރޯންތައް ވަނީ ރިޔާޟްގެ ކިންގް ޚާލިދު އިންޓަނޭޝަނަލް އެއަރޕޯޓާ ޖެހިގެން ހުންނަ ސަޢޫދީ އަރާމްކޯގެ ތެޔޮ ރައްކާކުރާ ގުދަނަކަށް އަމާޒުވެފައެވެ. މިކަމާ ގުޅިގެން ރިޔާޟްގައި ކުއްލި ނުރައްކަލުގެ އެލާޓްތައް ނެރެ، އެއަރޕޯޓުގެ އޮޕަރޭޝަންތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ހޮނިހިރު ދުވަހުގެ ހެނދުނު އެއަރޕޯޓް ކައިރީގައިވާ އަރާމްކޯގެ ތެޔޮ ގުދަނުން ކަޅުކުލައިގެ ބޯ ދުން އަރަމުންދިޔަ މަންޒަރު ފެނުމުން އަލިފާން ނިއްވާ މީހުން ވަނީ އެތަނުގައި ރޯވި އަލިފާންގަނޑު ނިއްވާލުމަށް ޙަރަކާތްތެރިވެފައެވެ.
މި ޙަމަލާއާ ގުޅިގެން ރިޔާޟް އެއަރޕޯޓުގެ ދަތުރުތަކަށް ބޮޑެތި ބުރޫތަކެއް އެރިއެވެ. ފްލައިޓްތައް ޓްރެކްކުރާ ’ފްލައިޓްރާޑަރ24‘ އިން އެއަރޕޯޓަށް ދީފައިވަނީ އެންމެ މަތީ ދަރަޖައިގެ ޑިސްރަޕްޝަން އިންޑެކްސް ކަމަށްވާ 5.0 އެވެ. ގިނަ ފްލައިޓްތަކެއް ވަނީ ކެންސަލްވެ އަދި ޑިލޭވެފައެވެ.
ރޭގަނޑު ދަންވަރު 3 ޖަހާއިރު ރިޔާޟްގެ ރައްޔިތުންގެ ފޯނުތަކަށް ވަނީ ”ވައިގެ މަގުން ނުރައްކާތެރި ޙަމަލާއެއް“ އަތުވެދާނެކަމުގެ ކުއްލި އިންޒާރުގެ މެސެޖުތަކެއް ލިބި، ގެއިން ބޭރަށް ނުނުކުތުމަށް އަންގާފައެވެ. މި އެލާޓް ނެރުނުތާ ކުޑައިރުކޮޅެއް ފަހުން ރިޔާޟްގެ މަތިން ދެފަހަރަށް ބާރުގަދަ ގޮވުމެއްގެ އަޑު އިވިފައިވެއެވެ. އޭގެ ބައިގަޑިއިރު ފަހުން ސިވިލް ޑިފެންސުން ވަނީ ނުރައްކާ ފަހަނައަޅައި ހިނގައްޖެކަން އިޢުލާނުކޮށްފައެވެ.
ހޫޘީންގެ އަސްކަރީ ތަރުޖަމާނު ޔަޙްޔާ ސަރީ ވަނީ ރިޔާޟްގެ މުހިންމު ތަންތަނަށާއި ޔަންބޫގެ ތެޔޮ ކާރުޚާނާތަކަށް ޙަމަލާދިންކަމަށް އެއްބަސްވެފައެވެ. ހޫޘީން ބުނާގޮތުގައި މިއީ ފާއިތުވި ހަފްތާއެއްހާ ދުވަހުގެ ތެރޭގައި ސަޢޫދީގެ މަތިންދާބޯޓުތަކުން ޔަމަނަށް ދިން 300 އަށްވުރެ ގިނަ ވައިގެ ޙަމަލާތަކަށް ބަދަލުހިފުމުގެ ގޮތުން ދިން ޙަމަލާތަކެކެވެ.
