ދިވެހިރާއްޖޭގައި އުޅޭ ބިދޭސީންގެ ތެރެއިން ވަނަވަރު ފުރިހަމައަށް ދެނެގަނެވިފައިނުވާ މީހުންގެ ނިސްބަތް އެއް އިންސައްތައިގައި ހިފެހެއްޓި، ބައިނަލްއަޤްވާމީ ގޮތުން ފާހަގަކޮށްލެވޭ ކާމިޔާބީއެއް ހޯދާފައިވާ ކަމަށް ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ޕީއެންސީގެ މަތީ މަޖިލީހުގެ ސެޝަނެއްގައި ވާހަކަދައްކަވަމުން ވަޒީރު ވިދާޅުވީ މި ސަރުކާރުން ވެރިކަމާ ހަވާލުވިއިރު ރާއްޖޭގައި އުޅުމުގެ ހުއްދަ އޮތް ގާތްގަނޑަކަށް ތިން ލައްކައެއްހާ ބިދޭސީން ތިބި ނަމަވެސް، އޭގެ ތެރެއިން ސީދާ ކާކުކަން ކަށަވަރުވެފައިވަނީ މަދު މީހުންގެ ކަމަށާއި އެކަމުގެ ސަބަބުން ގައުމީ ސަލާމަތަށް ބޮޑެތި ގޮންޖެހުންތަކެއް ކުރިމަތިވެފައި އޮތް ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު ފެއްޓެވި ހާއްސަ މަސައްކަތްޕުޅުގެ ދަށުން މިހާރު ރާއްޖޭގައި ތިބި ބިދޭސީންގެ ބޮޑު އިންސައްތައެއްގެ ފިންގަރޕްރިންޓާއި ބަޔޯމެޓްރިކް މައުލޫމާތު އެއްކުރެވިފައިވާ ކަމަށާއި، ބާކީ ތިބި މީހުންގެ ތެރެއިން ގިނައީ މިހާރު ރާއްޖޭގައި ނޫޅޭ މީހުންކަން ކަށަވަރުކުރެވިފައިވާ ކަމަށް ވަޒީރު ފާހަގަކުރެއްވިއެވެ.
މި ހޯދުންތަކާ އެކު، މުޅި ދުނިޔެއަށް ބަލާއިރުވެސް ބިދޭސީ އާބާދީގެ މައުލޫމާތު ފުރިހަމަނުވާ މީހުންގެ ނިސްބަތް އެއް އިންސައްތައިގެ ތްރެޝްހޯލްޑްގައި ހިފެހެއްޓިފައިވަނީ ދިވެހިރާއްޖެއާއި ސިންގަޕޫރު އަދި ޔުނައިޓެޑް އަރަބް އެމިރޭޓްސް (ޔޫ.އޭ.އީ) ގައި އެކަނި ކަމަށް ވެސް ވަޒީރު ވިދާޅުވިއެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމުގެ ގޮތުން ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ދަށުން، އަންނަ އަހަރުން ފެށިގެން ގަވާއިދާ ހިލާފަށް އުޅޭ ބިދޭސީއަކު ފެނިއްޖެނަމަ އިތުރު ފުރުސަތެއް ދިނުމަކާ ނުލައި ވަގުތުން ޑީޕޯޓްކޮށްލާނެ ކަމަށް ވަނީ އިއުލާނުކޮށްފައެވެ.
ގައުމީ ފެންވަރުގައި ބިދޭސީންގެ ކަންކަން ބެލެހެއްޓުމަށް ބަޔޯމެޓްރިކް ނިޒާމުތައް ގާއިމުކުރުމަކީ ބޯޑަރު ސަލާމަތްތެރިކަން ކަށަވަރުކުރުމަށާއި ގަވާއިދާ ހިލާފަށް މަސައްކަތް ކުރުމާއި ވިޔަފާރިކުރުން ހުއްޓުވުމަށް ދުނިޔޭގެ ކުރިއަރާފައިވާ ގައުމުތަކުން ވެސް ގެންގުޅޭ މައިގަނޑު ސިޔާސަތެކެވެ. ރާއްޖޭގައި މިފަދަ ނިޒާމެއް ހަރުދަނާކޮށް ތަންފީޒުކުރެވެމުން ދިއުމަކީ އިމިގްރޭޝަންގެ މައްސަލަތައް ހައްލުކުރުމަށް ލިބުނު ބޮޑު ކުރިއެރުމެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.
